Быйыл, 7-нши июльде, Астрахань каласыннан йолын баслаган халклар ара авторалли катнасувшыларын соннан 3 куьннен сонъ, 10-ншы июльде, оьз тарихинде биринши кере Дагестаннынъ Ногай эм конъысы районлар яшавшылары йылы йолыктылар. Бу уьйкен маьнели спорт шарасы Россия Президентининъ, РФ Оькиметининъ эм РФ ман ДР спорт министерстволарынынъ аркасы ман оьткериледи.

«Йибек йолы» деп аталган ралли-рейд элимизде 2009-ншы йылдан алып юритиледи. Быйыл сонынъ ортакшылары оьз тарихинде биринши кере Дагестан эм Шешен Республикалары, оннан сонъ Калмыкия, Волгоград эм Липецк областьлери уьстиннен оьтип, 16-ншы июльде Москвага етип, ювырысын тамамлаяклар. Автораллидинъ бас ниети – Россия ерлеринде патриотизм сезимин таралтув, халклар ара дослыкты беркитуьв.
Шилле айынынъ иссилигине (салкында 35 градус) эм ала давыл елге карамастан, Нариман авылынынъ ювыгында карт та, яс та йыйылган эди. Бу ерде тувра ашык шоьлде кораланган майданда Россия эм Дагестан, бурынгы ногай байраклары шатлыклы аьлде елпилдейдилер. Майданнынъ тувра ортасында курылган уьйкен кенъ сценага Ногай эм конъысы Кизляр, Тарумов районларынынъ, Южно-Сухокумск каласынынъ йыравшылары, ансамбльлери, вокал куьплери бирининъ артыннан бириси шыгып турдылар.
Майданнынъ ювыгында, бир 300-500 метр эрегиндеги кула шоьлде йогары тезлик пен келетаган автораллли катнасувшыларынынъ автомашиналары, квадроцикльлери эм баска туьрли техникалары келип токталадылар.
Халклар ара автораллидинъ катнасувшыларына багысланган концертти юритуьвши Сабират Абубекерова сценага сонынъ етекшилерининъ бириси Владимир Чагинди шакырады. Онынъ соьзлериннен йыйылганлар ралли-рейдтинъ басланганы, йоллары, бу кызыклы ярыстынъ катнасувшылары акында эситедилер. Айтпага, быйылгы ралли-рейдте баьриси 20 элден 80 экипажлар ортакшылык этедилер. Олардынъ санында солай ок, санкцияларга карамастан, Европадынъ да айырым белгили спортсменлери катнасадылар. Олар баьриси 4380 шакырым йолларды оьтееклер, солардынъ 2800 шакырымы – шоьлдеги кумлар, ашшы ерлер, енъил болмаган тав эм орман йоллары.
– «Йибек йолы» деп аталган халклар ара автораллидинъ катнасувшылары буьгуьн конаксуьер дагестан ерине келип турылар. Бизди Дагестаннынъ Ногай эм баска районларынынъ яшавшылары куьшли эскен елге эм куьн иссилигине карамастан, йылы карсы аладылар. Мен коьптен бери Дагестаннынъ тав районларында болмага суьетаган эдим, буьгуьн эндиги дагестан шоьллерин коьрип турыман, сизде бек ыспайы табиат. Ралли-рейдтинъ ортакшыларынынъ эслеринде сизинъ шоьллер коьпке дейим сакланар эм олар сизинъ республикага келуьви акында оьз тенъ-досларына эм кардаш-ювыкларына хабарлар деп сенемен, – деп билдирди дагестан ерине келуьви акында оьз ойын Владимир Чагин.
Онынъ айтувы ман, ралли катнасувшылары арасында Анастасия Нифонтова эм Екатерина Жаданова болган ялгыз бир кыскаяклылар экипажы да бар.
Владимир Чагин солай ок Россия Президенти эм Оькиметининъ ярдамы ман 2009-ншы йылдан алып халклар ара дережели болатаган бу автораллиди бизим россия еринде Дакардагыдан да ийги этпеге эм соны «Йибек йолы» деп атамага онъайлык туьзилди.
– Автоювырыс бек аьруьв болып озып туры. Уйгынлав ягын алып карасак, Дакардагы ярыслардан да бек яхшы деп айтпага боламыз. Буьгуьн бизим сынасларда катнасатаган спортсменлер баьриси де Дакарда болганлар эм олар тенълестирмеге, сонынъ акында абырайлы кепте оьз ойларын айтпага боладылар. Мен «Йибек йолы» – ол бизим аталык, дуныя дережели, дуныя оьлшемли авторалли деп шайытлайман, – деген сырын да айтты Чагин.
Соьйтип, сол куьн ралли-рейдтинъ катнасувшылары Ногай районы ериннен Грозный калага йолландылар. Соннан эки куьн оьткен сонъ олар тагы да бизим шоьллерден Элиста каласына карап оьттилер. 14-нши июльде командалар Элистадан Волгоградка карап шыгаяклар эм армаган белгиленген маршруты ман юрееклер.
М.Ханов.
Суьвретте: «Йибек йолы – 2022» авторалли катнасувшылары Ногай шоьллигинде.