Элимиздинъ бас каласы Москвада 4-нши июльде «Новые люди» партиясынынъ съезди болып оьтти. Сонынъ сырагылары бойынша партия РФ Госдумасына депутатлар сайлавларда катнасувга федеральлик списогын эм бир мандатлы округлар бойынша 200-ден артык кандидатлар коьрсеткен.

Съезд «Новые люди» партиясынынъ ортак федераллык списогы кесегине эки аьдемди беркитти – партия басшысы Алексей Нечаевти эм «халк мэри» Сардана Авксентьевады.
Оннан баска болып, 37 территориаллык туьркимлер бойынша кандидатлар коьрсетилген – баьриси 239 аьдем.
Солай ок «Новые люди» партиясы бир мандатлы округлар бойынша 215 кандидатлар коьрсеткен.
Партия басшысы Алексей Нечаев 2021-нши йылдынъ сайлавлары, конкуренция болып, авыр оьтеегин белгиледи.
«Новые люди» партиясыннан депутатка кандидатлар арасында бизим ердесимиз, Терекли-Мектеб авыл яшавшысы Залина Акманбетова да (суьвретте) бар. Мине онынъ Инстаграм соцсетинде язганы:
«Оькинишке, мен съездке баралмадым, ама депутатка кандидатлар сырасына туьсермен деген сенимим бар эди. Туьнегуьнги куьним мен уьшин навасызлы оьтти десем, оьтирикши болман. Кешке таман мен РФ Госдумасына депутатка кандидат экенимди билдим. 100-ден артык блогерлерден депутатлыкка кандидат эсабында 30-га ювык аьдем калган. Бас деп бу янъылык пан ата-анамды суьйиндирдим, неге десе олар да мени мен бирге тынышсызланып турдылар.
Кутлавларынъыз уьшин савболынъыз, дослар! Сайлавлар сентябрь айында оьтеек, эм алдыда аьли де коьп куллык бар. Бир мырадыма етистим. Энди армаган адымлайман».
Биз Залина Акманбетовады ак юректен кутлаймыз эм армаган яшав йолында тек уьстинликлер йораймыз. Шынтысы ман да, алдыда – ислер коьп.