Россия Президенти Владимир Путин РФ Оькиметине эм «Газпром» ОАО-га газ тармагы бар болган авыл ерлеринде газ еткерилмеген гражданлардынъ уьй участокларынынъ япсарларына дейим газды тегин элтев акында тапшырмалар берген. Соны ман байланыста сол исти бажарув уьшин аьризе беруьвдинъ йорыклары эм заманы акында газетамыздынъ хабаршысы ООО «Газпром газораспределение Дагестан» Ногай районындагы ЭГС етекшиси Шамиль Акбулатовтан явап алган.
Россияда быйылдан алып газ тармагы бар болган авыл ерлеринде кайдай ды бир себеплерден уьй участокларына дейим газ элтенмей калган яшавшыларга газды еткеруьв программасы ислеп баслаган. Соны ман байланыста эндигиси оьз уьй участогына дейим газды еткеруьвге аьризеди онлайн йорыгы ман бермеге болады, эм сол ислер тегин кепте этилинмеге тийисли.
Газды уьй участогына дейим еткеруьв яде догазификация – ол газсыз уьйди газ тармакларына косув. Болса да, бу ерде газ тегин кепте тек уьй иесининъ ер участогына дейим еткериледи, эм сол ок заманда авылда газопровод бар болмага тийисли. Уьй мен ер участогына байырлык кеби аьзирленмеге керек болады. Оьзининъ ер участогынынъ япсарыннан уьйине дейим газды уьй иеси оьз карыжы аркасы ман салдырмага борышлы. Сол ислер уьшин ол тоьлемеге тарык болады. Тек сол ок заманда гражданлардынъ кайбир куьплерине газды уьйине еткергени уьшин компенсация да каралады.
Яшавшылардан уьйлерине дейим газ еткеруьв акында аьризелер газ компанияларынынъ офислеринде эм МФЦ-ларда алынады. Аьризеге ситуационный план да косылып берилмеге керек. Сол план ерли администрацияда яде ер комитетинде аьзирленеди. Оннан баскалай, ыхтыяр беркитуьвши документлер де бериледи. Олай дегени, сатув-алув акында келисуьв, уьй участогына асабалыкка ыхтыяры барлыгы акында шайытлама. Аьризе солар ман бирге бериледи.
Аьризе берген аьдемнинъ уьйине кайзаман газды еткеруьвдинъ заманы белгиленмеген. Ал деп берилген аьризелер каралаяклар, сонъ соларды толтырув уьшин техникалык шартлар аьзирленеек эм газопровод уьй иесининъ ер участогына дейим еткерилеек. Бу ислер бир айдан алып бир йылга дейим яшавга шыгарылмага каралады.
Сыйлы яшавшылар! Газды еткеруьв программасы бир неше йылларга дейим аьрекет этеек. Сол себептен газ тармаклары бар болган авыллардагы газ еткерилмеген уьйлерге газ элтенеегине сенмеге боласыз. Газды еткеруьв бойынша соравларынъыз бар болса, район газ кулланув службасына келмеге яде тел сокпага ыхтыярынъыз бар.
М.Юнусов.
