Янъыларда Дагестан Оькиметининъ Председатели Абдулмуслим Абдулмуслимов ДР Халк йыйыны алдында эсап беруьв доклады ман шыгып соьйледи. Ол энъ де баслап дагестанлылардынъ СВО сырасында коьрсетип турган йигитлиги акында айтты. Сол бек дурыс. Буьгуьнлерде бизим яслар баьтирлерше яв ман согысадылар, оьз яшавын аямайдылар, дуныяда тынышлык болсын деп ян бередилер.
Татаюрт – Бабаюрт районынынъ ногайлар яшайтаган авылы. Сол авылдан кетсем, студент йылларым эсиме туьседи, коьп йыллар артта мен мунда келетаган эдим, кыймасым Эльмира Атаева бу авылда яшайтаган эди. Аьлиги заманда да оны ман байланыс тутаман. Татаюртта конаксуьер, ийги аьдемлер яшайдылар, сога коьре бу авылдынъ йигитлери Украина еринде озгарылып турган согыс спецоперациясында явды аямай урадылар деген хабар биревди де сейирсиндирмейди. Олардынъ сырасында – Байрамали Сали увылы Абидуллаев. Байрамали – Ажай Ахмед кызынынъ энъ де кишкей увылы, уьйкенлери – Махач эм Анзор баска яшайдылар. Байрамали ногай аьдетке коьре, анасы ман турады.
Ажай Абидуллаева эрин 11 йыл артта йойган. Кашан да, кеделерге ата насихат та, тербиялав да керек. Болса да, агалы-инили Абидуллаевлер атасынынъ оларды уьйреткен аьр бир соьзин эсинде саклайдылар. Аьдиллик, аьдемшилик, йигерлик касиетли болынъыз деп айтатаган эди Сали Абидуллаев увылларына, буьгуьнлерде юрегинде сол насихат пан согысувга кетеди онынъ энъ де кишкей увылы Байрамали. Ол Татаюртта тувып-оьсти, мунда окыды, эр борышын толтырмага кетти. Сонъ коьлик айдавшыга окыды эм ислеп баслады. Повестка келген заманда, Ажай Ахмед кызы Кудай онынъ увылын эм баьри ясларды ят ерде сакласын деп тилек салды. «Кедем бармасын» деген ой басына келмеди анадынъ, увыллар оьстирген хатын сондай затка оьзин аьзирлейтагандыр деп эсиме келеди. Аьли де тилейди Ажай Абидуллаева, увылынынъ согыс спецоперацияда болган куьнлерин санайды. Аьр заманда увылы ман соьйлемеге амал болмайды. Кыска соьйлевлерде увылы: «Кыйналма, анам, менде баьри зат та аьруьв» деп айтады. Кайтип кыйланмасын анадынъ юреги, кайтип авырмасын, увылын ата-ана уьйден узакка йиберип? Ажай Ахмед кызы анълайды, эр киси – Аталыкты саклавшы.
Байрамали уьйге енъуьв мен кайтып келер. Соны авылшылар да, анасы да, агалары да биледилер. Россия Президенти Владимир Путин айтканлай: «Бизим ягымызда акыйкатлык». Сога коьре, енъуьв де бизики болар.
Г.Бекмуратова
Суьвретте: Б.Абидуллаев.