Дагестанда коронавируслы юкпалы маразы ман авырыган аьдемлерди «антиковидная плазма» кулланып эмлеп баслаганлар. Бу куьнлерге республикамызда сондай плазмадынъ юзеви аьзирленген, олардынъ бир кесеги авырыганларды эмлевге кулланылады, экиншиси– сакланылып турады.

Плазма коронавируслы юкпалы маразы ман авырып, савболганлардынъ каныннан аьзирленеди. Дагестан Республикасынынъ Савлык саклав министерствосы коронавирус пан авырып, савболган яшавшыларына сол мараз бан буьгуьн авырыганларга ярдам этпеге шакырады. COVID-19 юкпалы маразына карсы плазмадынъ доноры болар уьшин врачка тергелип, Кан куюв республикалык станциясына кан бермеге тийисли. Станция Махачкалада Атаев орамында орынласкан.
Белгиленген плазмадынъ доноры Дагестанда яшаган яде алты айдан бери яшайтаган Россиядынъ гражданини болмага болады. Кан бермеге суьйген аьдем 18-55 ясында эм шеккиси 50 килограммнан артык болмага керек. Солай ок ол аьдем авырып, савболганнан сонъ 14 куьннен артык заман оьтпеге тийисли.