Биз, XXI оьмирдинъ яслары, енъил тувыл заманда яшаймыз. Быйыл боьтен де авыр болып оьтти. Баска йыллардан бу йыл биревге де белгили тувыл маразы кенъ яйылувы ман баскаланады. Сол мараздынъ акында увыт айында айткан заманда, биз ойлап та болмадык, кайдай кыйынлыклар бизге аькелеегин. Бу авырув тек бизим шоьлимиздинъ тувыл, савлай дуныяда яшайтаган аьр бир аьелдинъ капысын ашар деп ойламадык.

2020-ншы йылдынъ язлыгын баьримиз де куьтип турган заманда, бизге савлай элимиз бен уьйде олтырмага туьсти. Кашан да, баьрисине де бу куьнлер айлак кыйынлы болды. Уьйде олтырмага да болаяк эди, ама яман мараз коьплеген ювыкларымыздынъ ден савлыгын бузды, врачлар сол авырувды кайтип эмлемеге керегин баслап билмей калдылар. Сондай авырув оларга янъылык болды. Мараздынъ бар экенине ынанмаганлар да бар эди. Янъы коронавирус маразы савлай дуныяды алды, бизим юреклеримизге коркынышлык эндирди. Меним эсимде биринши кере специальли кийим кийген врачларды коьргеним, бизим авылга «тезлик ярдам» коьлиги келип, авырувлыды аькеткен эди. Меним коркканым эсимде калды, Марстан бир ят аьдемлер келгендей болды. Сонъында мен оларды коьргенде, юрегимде коркыныш тувыл, оларга уьйкен сый туватаган эди. Ак халатлылар оьз яшавына кавыфлык тувдырып, халкымызды, кара явдай болып келген мараздан, коршаладылар. Медицина куллыкшыларынынъ баьтирлиги уллы эди. Олар аьеллерин таслап, балаларын калдырып, куллыкта кеше-куьндиз ислейтаган эдилер.
Район бойынша яй куьнлеринде медицина куллыкшыларын коьтергишлев ниет пен акция озгарылды, сол акцияда Карасу авыл орта мектебининъ окытувшылары да белсен катнастылар. Биз аьли де кишкей, ама биз де яваплылык пан туьзилип турган аьллерге карамага керекпиз. Бизге айтылган талаплавларды толтырып, кавыфсызлык амалларды тутайык деп тенълериме, баьри аьдемлерге айтаман. Соьйтип, биз дуныяда болып турган маьселеди уьйкенлер мен бирге шешип болармыз.
Келеекте не болар экен? Коьп аьдемлер бу соравды бередилер. Мараз кутылар, ама дуныя баягыдай боларма экен? Уллы Махатма Ганди айткан: «Дуныяды туьр- лендирмеге суьетаган болсанъ, оьзинъди туьрлендирип басла». Аьлиги туьзилген аьллерде биз яваплылык сезимимизди оьткирлетип, колымыздан келген шаклы мараз бан куьресейик.
Альвида Арунова,
Карасу авыл орта мектебининъ 9-ншы класс окувшысы.