Янъыларда Сырт Кавказ уьшин 1942-43-нши йылларда юритилген согысларда Ногай (Караногай) районы немец-фашист аьскерлериннен босатылганлы 80 йыллыгына багысланып, Орта-Тоьбе авылдынъ кубыласында орынласкан Москва хуторы ериндеги кардаш камырында эстеликли шара болып оьтти.
Айтылган ерде 1942-нши йылдынъ 23-24-нши декабрь куьнлеринде болып озган каты согысларда ян берген совет аьскершилери мен офицерлери койылган.
– Буьгуьн биз тарихимиздинъ энъ кайгылы эм авыр оьзгерислерининъ бириси: 1942-нши йылдынъ октябрь-декабрь айларында болган ислерди эскеремиз. Онлаган йыллар оьтсе де, биз тагы да кайгырамыз эм Уллы Аталык согысынынъ баьри сынавларын оьткенлерди, оьзлери оьлсе де, Тувган Элин явдан кошалаганларды уьйкен оьрметлик пен эскеремиз. Мунда, мине бу ерде оьткен авыр согысларда, 4-нши гвардиялы Кобан атлы корпусынынъ 32-нши атлы полкы эм гвардиялы Дон корпусынынъ аьскер боьликлери катнасканлар. Бизге бу ердеги кардаш камырында 70 йылдан артык заман койылган 16 совет аьскершилери мен офицерлерининъ атларын эм тукымларын излестирип таппага амал табылды, – деп белгиледи оьз соьзинде Орта-Тоьбе авыл орта мектебининъ директоры С.Межитова.
Эстеликли митингте шыгып соьйлеген Ногай район администрациясынынъ аькимбасынынъ орынбасары Б.Ярлыкапов бу озгарылып турган шара Уллы Аталык согысынынъ Сырт Кавказ уьшин юритилген согыс кампаниясынынъ, сонынъ эсабында Ногай районынынъ ерлери немец-фашистлериннен босатылганлы 80 йыллыгы ман байланыслы экенин белгиледи. Ол бу ердеги кардаш камырында койылган совет аьскершилери мен офицерлерининъ атларын излестируьв уьстинде куллык эткен Орта-Тоьбе авыл мектебине эм авыл администрациясына разылык билдирди.
– Буьгуьн де сондай авыр заманлар, – деди Баймагомед Ярлыкапов. – Уллы Аталык согысыннан сонъ оьлтирилмей калган фашизм эндигиси Украинада басын коьтереди. Буьгуьнлерде бизим ердеслеримиз оьз ыхтыяры эм мобилизация йорыгы ман сонда бизим аьлиги тынышлы яшавымызды коршалайдылар.
Эстеликли шарада Ногай районынынъ Савытлы куьшлерининъ эм ыхтыяр саклавшы органларынынъ ветеранлар советининъ председатели А.Сангишиев, район Хатын-кызлар советининъ председатели А.Манкаева, «Единая Россия» политикалык партиясынынъ Ногай район боьлигининъ яваплы секретари А.Межитов шыгып соьйледилер.
Шарада Орта-Тоьбе эм Уьйсалган авыл орта мектеблерининъ окувшылары эм окытувшылары, солай ок Ногай патшалык саз алатлар оркестрининъ солистлери, район Халк яратувшылык уьйининъ куллыкшылары эм баскалар белсен катнастылар.
М.Юнусов.
Суьвретте: Москва-хутор еринде янъыдан курылган эстелик касында.
