ДР Оькиметининъ Председатели Абдулмуслим Абдулмуслимов Дагестан экономикасын оьрлентуьвдинъ берклигин канагатлав бойынша Оперштабынынъ кезекли йыйынында республикада язлык кыр куллыклары кайнавлы аьлде юритилип турганы акында билдирген.

Республикадынъ Авыл хозяйство эм тамак-азык министри Баттал Батталов быйыл 225 мынъ гектар эгин кырларында язлык шашув ислери оьткерилгени эм сол коьрсетим былтыргыдан 10 мынъ гектарга артык экенин белгилеген.
Язлык культуралары баьриннен де коьп Кизляр районында – 36 мынъ гектардан артык, Хасавюрт районында – 33 мынъ гектар, Тарумов эм Бабаюрт районларынынъ аьр бирисинде – 16 мынъ гектар ерлерге шашылган.
Ногай районында да буьгуьнлерде язлык шашув ислери 7 мынънан артык гектар эгин кырларында оьткерилген. Эгиншилер язлык арпа, сулы, лен, ералма, люцерна, суданка эм ясылша культураларын шашканлар.
Батталовтынъ соьзине коьре, республикада аьлиги заманга 72 мынънан артык гектарлар шашылып биткен, ол планда белгиленген язлык шашув куллыкларынынъ 32 проценти болады. Оьткен йыл сол ок заманга 63 мынъ гектарга язлык эгинлери шашылганы белгиленген.