Ногай район администрациясынынъ кезекли аппарат йыйынын район етекшиси Мухтарбий Аджеков оьзининъ янъыларда Москвада оьткен Савлайроссиялык «Единая Россия» политикалык партиясынынъ ХХ курылтайында болганы акында хабарлавы ман баслады.
Курылтайда Дагестан Республикасыннан баьриси 24 делегат республика етекшиси Сергей Меликовтынъ басшылыгы ман катнаскан. Курылтайдынъ исинде Россия Президенти Владимир Путин, «Единая Россия» партиясынынъ етекшиси Дмитрий Медведев, РФ Оькиметининъ Председатели Михаил Мишустин эм коьп баска белгили аьдемлер ортакшылык эттилер.
Курылтайды Дмитрий
Медведев ашты. Сонъ Путин бир саьат узагына оьз докладында элдинъ социал-экономикалык оьрленуьви, ясларды колтыклав, мектеб- лерди ярастырув, коьп баска тармаклар акында хабарлады. Партия РФ Государстволык Думасына депутатларды сайлавлар кампаниясын баслаганын эм партия сырасыннан коьп ийги кандидатлар сайлавларга беркитилеегин билдирди.
Мухтарбий Аджековтынъ айтувы ман, янъыларда республикадынъ Ис эм социаллык оьрленуьв министерствосынынъ кенъеси эм 21-нши июньде элимизде Яшавшыларды иске ерлестируьв орталыклары туьзилип баслаганы ман байланыста районымыздынъ социаллык тармагынынъ бир неше етекшилери эм куллыкшылары Сый грамоталарына тийисли этилингенлер. Коьпйыллык эм кайратлы иси уьшин сондай грамоталар ман Ногай район администрациясынынъ КЦСОН директоры Гульфира Капитуллаева, Ногай район администрациясынынъ Яшавшыларды иске ерлестируьв орталыгынынъ директоры Рустам Такташев, Орталыктынъ куллыкшылары: Роза Карагулова, Кунбийке Сагиндикова, Зарета Эльгайтарова, Альбина Эсиргепова, Индира Сахтаева савгаландылар.
Район аькимбасы Яшавшыларды иске ерлестируьв орталыгы район ериндеги баска ис коллективлери арасында тийисли орынды тутатаганын айырып белгиледи.
Йыйыннынъ куьн йосыгына коьре, Ногай район администрациясынынъ Ясы етпегенлер ислери эм олардынъ ыхтыярларын коршалав бойынша комиссиядынъ 2021-нши йылдынъ биринши ярым йылы узагында эткен куллыгынынъ сырагылары акында сонынъ председатели Зухра Аджиманбетова доклад этти.
Докладшыдынъ айтувы ман, Комиссия ясы етпегенлер мен куллык этуьвдинъ туьрли кеплерин эм йорыкларын кулланады. Олай дегени, Комиссия йыйынлары, хабарласувлар, кенъеслер, ата-аналар ямагаты ман йолыгысувлар, социаллык ягыннан кавыфлы аьллерде болган ясы етпегенлердинъ аьеллерине рейдлер мен барувлар оьткериледи. (Комиссиядынъ куллыгы акында газетадынъ кезекли номеринде баспаланаяк).
Муннан сонъ йыйын катнасувшылары Ногай район администрациясынынъ ер тергев эм муниципаллык муьлки бойынша боьлигининъ юритетаган куллыгы акында сол боьликтинъ етекшисининъ куллыгын кесек заманга юритуьвши Арсен Сабутовтынъ докладын тынъладылар.
Онынъ билдируьви мен, быйыл Дагестан Республикасы бойынша Росреестр управлениесинде ортак ер майданы 186553 квадрат метр болатаган 29 ер участоклары эсапка алынган. Сол ер участоклары район орталыгында курылган Кадрия атындагы паркынынъ, Нариман авылында курылаяк физкультура-савландырув комплексининъ, Куьнбатар авылда – маданият уьйининъ, Червленные Буруны авылында – балалар бавынынъ, район еринде казылаяк 13 артезианларынынъ, Бораншы, Карагас эм Куьнбатар авылларында курылмага каралатаган 3 киши-футбол майданларынынъ, Куьнбатар ман Бораншы авылларында – 2 балалар майданларынынъ курылыслары уьшин берилген (боьликтинъ юриткен ислери акында газетадынъ кезекли номеринде баспаланаяк).
Йыйыннынъ тамамында Мухтарбий Аджеков район бойынша янъы коронавирус юкпалы маразына карсы вакцинация куллыгынынъ юрисине эс этти. Ол оьзи атыннан Ногай ЦРБ медицина куллыкшыларына ызгы куьнлерде вакцинациялав ягыннан ислерди шугыллатканы уьшин разылыгын билдирди. ЦРБ бас врачынынъ орынбасары З.Шугаипова ызгы куьнлерде Ногай ЦРБ-сында куьн сайын 93-100 аьдемге вакцина сугылувын билдирди. Йыл басыннан алып бу юмадынъ басына район яшавшыларынынъ 14 процентине вакцина сугылган.
Мухтарбий Аджеков Москвада коронавирус пан байланыслы аьллер авырланганын билдирди. Ол йыйылганларды халкты вакцинациялав исин амал болган шаклы кенъейтпеге шакырды, неге десе юкпалы мараздынъ янъы кезеги басланып туры.
Район аькимбасы шегерткиге карсы куьрес юритуьвши район оперативли штабына эм айырым кепте «Россельхозцентр» бас агрономы Сейдали Союновка быйылгы яваплы ислери уьшин разылык билдирди. «Буьгуьнге Бажиган, Куьнбатар, Карагас бетлердеги кырлар дарманланган, район бойынша шегертки мен байланыслы аьллер толы кепте тергеледи», – деди Мухтарбий Аджеков.
Бизим хабаршы.
Суьвретте: З.Аджиманбетова доклад эткен шакта.
