11-нши июльде Дагестанда ис йорыгы ман РФ Федераллык Йыйынынынъ Федерация Советининъ председатели Валентина Матвиенко конакта болган.

Сол ок куьн Валентина Матвиенко Дагестан Аькимбасы Сергей Меликов пан йолыгыскан. Дагестан етекшиси оьз ягыннан россия сенаторларынынъ басшысына, онынъ тилегин кабыл этип, республикага келгени уьшин разылыгын билдирген.
РФ Федерация Советининъ етекшиси республика еринде «Дагестан Республикасынынъ социал-экономикалык оьрленуьвин патшалык яктан колтыклав акында» деген токтастынъ яшавга шыгарылувы ман таныскан, солай ок регионда курылып турган бир неше маьнели социаллык объектлерин барып коьрген эм Россия халкларынынъ маданият асабалыгынынъ йылына багысланган шараларда ортакшылык эткен.
Валентина Матвиенко эм Сергей Меликов Дагестаннынъ социал-экономикалык оьрленуьви бойынша кенъесуьв йыйынын оьткергенлер.Валентина Матвиенко былтыр Дагестан куьнлерининъ сырагылары бойынша РФ Федерация Совети регионнынъ социал-экономикалык оьрленуьвине демевлик этуьв ниетте тийисли токтас алганын эске салды. «Биз сол куьнлерде кабыл этилинген баьри карарлар да толтырылсын деп колымыздан келген баьри затты да аямаспыз. Солардынъ бир кесеги аьли яшавга шыгарылган, калган кесеги толтырылув уьстинде», – деп белгилеген спикер.
Кенъестинъ барысында ойласылган соравлар ишинде солай ок биз уьшин маьнели Кизляр отлакларынынъ ерлерининъ кумланувын токтатув эм соларды яхшыртув соравлары да каралганлар.