Россия Президенти элимиздинъ Конституциясына туьрленислер киргистуьв уьшин тавыславда катнаскан баьри Россия яшавшыларына разылыгын билдирген эм Асыл законга туьрленислерди киргистуьвге карсы болганларды да анълайтаганын билдирген.

Онынъ ойына коьре, аьли де Россиядынъ онъайлыгын беркитуьв уьшин заман керегеди. «СССР бузылган сонъ коьп заман кетпеген, аьлиги замандагы Россия эндиги де туьзилуьв шагында – сонынъ эсабында онынъ политикалык тармагы да. Кимлер Конституцияга туьрленислер киргистуьвге карсы болганларын да анълайман, бизде аьли де шешилмеген маьселелер коьп, ол зат дурыс», – деп макул болган Путин.

Патшалыгымыздынъ етекшиси 25-нши тамбыз айыннан 1-нши шилле айы куьнлеринде оьткерилген тавыславда катнаскан эм оьз тавысларын туьрленислер киргистуьв уьшин берген баьри гражданларга разылыгын билдирген. Президент гражданлардынъ сондай сенимлигин баалайтаганын белгилеген.

Тавыславдынъ сырагылары келтирилген сонъ РФ Орталык Сайлав Комиссиясы сонда катнасканлардынъ 77,2 проценти Конституцияга туьрленислер киргистуьвди хош коьретаганын билдирген. Тавыславда баьриси сайлавшылардынъ 65 проценти ортакшылаган.