Быйыл 24-нши августта Москвада «Единая Россия» Савлайроссиялык политикалык партиясынынъ ХХ курылтайынынъ экинши кезеги болып оьткен. Бу шарада видеоконференц байланыс аркасы ман Россия Президенти Владимир Путин катнаскан эм шыгып соьйлеген.
Патшалыктынъ басшысы оьзининъ соьзин партия активистлери регионларда, муниципалитетлерде, ерли-еринде сайлавшылар ман ашык кепте хабарласув негизинде белсенли куллык юритуьвине йогары баа беруьвиннен баслады. «Сизде бу бек аьруьв болып оьтти деп санайман. Элимиздинъ баьри де регионларынынъ яшавшылары «Единая Россия» партиясынынъ программасынынъ соавторлары болдылар. Сонынъ уьшин программадынъ оьзин де халк программасы деп атамага ярайды», – деп белгилеген Президент.
Путин солай ок куллыксызлык маьселесине де эс бермей оьтпеди. Онынъ айтувы ман, яшамага бир амалсыз калган эм оьзине ис орынын таппайтаган аьр кимге де коьмек этуьв керегеди. Яс несиллерди куллыкка ерлестируьвге демевлик этуьвдинъ айырым программасын аьзирлемеге деген тапшырма бар. Соны ман бирге куллыксызлык оьткир маьселе болып токтаган федерация субъектлери уьшин адресли шараларды да аьзир этуьв керегеди. Президент партияды белгиленген планларды яшавга шыгарувга белсенли кепте кириспеге шакырды.
Патшалыктынъ етекшиси солай ок сакат аьдемлерди иске орынластырувга коьмек этуьв айырым программасын да аьзир этпеге тарык, деди.
Владимир Путин элдинъ экономикасы кайтадан тургызылганын белгилей берип, сонынъ аркасы ман Оькимет бас деп косымша ярдамын балаларга, коьп балалы аьеллерге, пенсионерлерге этпеге болаягын билдирди.
«Оькиметтинъ эсин мине затка каратаман: экономикадынъ оьсуьви берк, сапатлы эм узак заманлы болсын, сонынъ негизинде аьдемлердинъ келимлери артсын эм янъы ис орынлары ашылсын. Солай болганда бизге оьрленуьвдинъ кенъ оьлшемли проектлерин ислетпеге, инфраструктура кредитлериндей янъы алатларды, мысалы, Алыс Куьнтувар, Арктика уьшин программаларды яшавга шыгармага, негизли инфраструктура амалларын кенъейтпеге керегеди. Сога Москва – Казань – Екатеринбург тезлик пен ювыратаган автомобиль йолынынъ курылысын коспага тарык болады, сол йолды Тюменьге дейим созбага кенъес этемен. Бас орында, солай ок, «Северный широтный ход» деп аталган темир йол магистралин курув планы да бар, сол зат Арктикадынъ, Уралдынъ, Сибирьдинъ, Ангаро-Енисей регионнынъ оьлшемсиз уьйкен табиат байлыкларын кулланув уьшин ис белсенлигин демевлемеге ярдам этеек. Бизде аьли ок та сондай куллыкларга урынув уьшин алатлар эм карыж булаклары коьп бар», – деп белгиледи Путин.
Пропуск…….
Оьзининъ соьзинде элдинъ басшысы авыл ерлерининъ оьрленуьвине де айырым эс этти. Ол авыл хозяйствосын россия экономикасынынъ бас тармакларынынъ бириси деп атады. Президент партиядынъ авыл фермерлерине, киши предпринимательлерге, сав эл бойынша ярмалыкларды эм стандартлы болмаган савда точкаларын оьрлентуьвге коьмек этуьвге аьзирлигин толы кепте макул коьруьвин билдирди. Соьйтип, онынъ соьзлерине коьре, фермерлер оьз продукциясын аражыларсыз яшавшыларга сатпага амал табаяклар. Бу шараларды яшавга шыгарув, Президенттинъ ойы ман, тамак-азык товарларынынъ бааларын тоьменлетпеге ярдам береек. «Ама баска зат та бизге бек маьнели: авылда ислейтаган аьдемлер сав элди тамакландырадылар, олар оьз яшав сапаты коьтерилип бараягына сенмеге керек боладылар. Бизге авыл ерлерин комплексли аьлде оьрлентуьв, мунда заманга келисли инфраструктуралар, йоллар, социаллык объектлерин, онъайлы турак уьйлер курмага, газификация программаларын яшавга шыгармага баьри амалларды коьрмеге керегеди», – деп белгилеген Путин.
Россия Президенти, солай ок, партия етекшилери мен болып оьткен йолыгыста «Россия почтасынынъ» боьликлерининъ амалларын кулланув керек деген ой-ниетти макул коьретаганын билдирди. Онынъ айтувы ман, солар аьр бир авыл еринде бар. Соларды янъыртувды ойлав керегеди, солар, мысалы, дарманларды, азык-туьликти еткеруьвди, госуслуги ортак бир порталыннан справкалар эм выпискалар аьперуьвди, МФЦ-га керекли документлерди йиберуьвди, аьдемлерге тарык болган баска ярдамларды этуьвди онъласын деп.
Президент юкпалы маразды сав элимиз бен бирге енъмеге болады деп билдирди. Коронавируска карсы бас савыт – ол вакцинация, деди Путин.
Элимиздинъ етекшиси медицина тармагын оьрлентуьв бойынша айырым программады яшавга шыгарув акында карар алынганын билдирди. Онынъ айтувы ман, Россиядынъ баьри ерлеринде де медициналык ярдамынынъ сапатын арттырувды канагатлав керегеди. Бас маьне аьдемге, онынъ савлыгын саклавга берилмеге тийисли.
Патшалыктынъ басшысы миллет идеясы акында темады да козгады. Онынъ соьзлерине коьре, сол идея бизге бек якын эм керекли, эм ол да не десенъиз, «уьйинде эки, уьш, доьрт эм артык балалары болган, эмишлик пен яшайтаган берк аьел, мине бу зат, дурысын айтканда, Россиядынъ келеектегисининъ келпети болмага тийисли. Балалар, ата-аналардынъ суьйимлиги, несиллер арасында макулласувлык – ол бизим коьп миллетли эм коьп конфессионаллы элимиздинъ баьри аьдетлерине эм маданиятларына келисли байлык», – деп белгилеген Путин.
