Бурынгы заманлардан алып врач кесписи сыйлы кеспилердинъ бириси деп саналады. Ол энъ де танъ, аьдемшиликли, соны ман бирге баьтирлик кеспилердинъ бириси болады. Дуныя юзине яратылган сонъ врачтынъ колында аьдемнинъ ден савлыгы эм яшавы. Онынъ алдында маразды эртеректен аянлап, аьдемге авырувды енъмеге ярдам этуьв борышы турады. Врачтынъ маразлыга йылы соьзи мен эс этуьви эм каьр шегуьви де эмлевдинъ бир кезеги болады. Неше врачлар кеспи борышын толтырувда оьзлерининъ яшавын эм ден савлыгын аямаганлар, айтпага, эпидемиялар эм янъы коронавируслы пандемия заманларында. Бизим республикамызда эм районымызда бу сыйлы исти тийисли толтырып келген белгили врачлар аз тувыл. Оннан оьзгелей, сондай врачлар сырасында медицина исине суьйимликти оьз аьелинде несилден- несилге коьширип болганлар да бар.
Ногай районында Арслановлардынъ эм Абдурахмановлардынъ врачлар династиясы баьрисине де белгили. Арслановлардынъ врачлар династиясынынъ басында онынъ баьри ваькиллерине коьрим болган Ахмат Сулейманович, Абдурахмановлар несилинде – Асрет Сарсеевна турадылар.
Дагестаннынъ савлык саклав куллыкшыларынынъ Профсоюзы ДР Савлык саклав министерствосынынъ коьтергишлеви мен янъыларда «Дагестанская медицинская династия» деген конкурс уйгынлаган. Бу конкурста Ногай районыннан йогарыда белгиленген аьеллер катнасып, онынъ баргысына тийисли болганлар.
Абдурахмановлардынъ врачлар династиясынынъ негизшиси Дагестан Республикасынынъ ат казанган врачы Асрет Сарсеевна, ак халатты кийип, ак ниетли аьрекетин 53 йылдан бери бардырады. Ол Дагестан патшалык медицина институтынынъ эмлев факультетинде окыган. Асрет Абдурахманова (кыз тукымы Узаирова) 6 мынънан артык балалар болган Ногай районында ялгыз педиатр болып ислеген заманы да болган. Сол йылларда кыскаяклы-врач балалар консультациясында да, стационарда да ислеп, солай ок баска авылларга да саьбийлерди карамага барып уьлгирген. Йогары категориялы врач 1994-нши йылда Шумлелик авылында холера авырувынынъ яйылувына карсы шараларын уйгынлап, авырувдынъ яйылувын токтаткан. А.Абдурахманова 18 йыл узагына – методикалык уйгынлав куллыгы бойынша бас врачтынъ орынбасары, 2008-2010-ншы йылларда Ногай район больницасынынъ бас врачы, сонъ Гражданлык коршаланув бойынша бас врачтынъ орынбасары болып куллык эткен. Асрет Сарсеевнады «земский доктор» деп суьйип атаганлар, ога терапевт, фтизиопедиатр, психиатр, инфекционист болып та ислемеге туьскен.
Асрет Сарсеевнадынъ уьш баласы эм келини де бактыларын медицина ман байланыстырганлар. Кедеси Мурат Нурсаидович – балалар хирургы. Ол 1-нши номерли Сургут кала клиникалык больницасынынъ 2-нши Балалар хирургия боьлигининъ заведующийи. Мурат Абдурахманов – Балалар хирургларынынъ Россия ассоциациясынынъ агзасы, Россия хирурглар ямагатынынъ агзасы. Онынъ хатыны Гульфия Халитовна 2-нши номерли Сургут кала клиникалык поликлиникасында врач-невролог исин бардырады. Мурат эм Гульфия Абдурахмановлар медицина исин 21 йыл узагына бардырып келедилер. Асрет Сарсеевнадынъ эки кызы Алимет Бальгишиева эм Эмина Саитова врач-педиатр болып Сургуттагы реабилитация орталыгында: биреви – 23, экиншиси – 24 йылдан бери аьрекетлейдилер. Олар доьртеви де йогары категориялы врачлар боладылар. Соны ман Абдурахмановлардынъ аьелинде медицина исине суьйим несилден-несилге коьшуьви токтамайды. Асрет Сарсеевнадынъ йиени Камиля Бальгишиева Сургут патшалык университетининъ медицина институтында, уныгы Фатима Абдурахманова академик И.Павлов атындагы Биринши Санкт-Петербургтагы патшалык медицина университетинде окыйдылар. Солай ок врачлар династиясынынъ негизшисининъ аданасларынынъ кызлары Айсенет, Айганат, Маржанат эм аданасынынъ уныгы Алият та врач кесписин сайлаганлар. Айсенет Яхьяевна «Военизированная горноспасательная часть» ФГУП – нинъ Норильсктеги аьскершилердинъ тав-куткарувда аьрекет этуьвши отрядынынъ тергев-аналитикалык лабораториясынынъ етекшисининъ орынбасары болып куллык этеди. Солай ок Айганат эм Маржанат Узаировалар Сургут патшалык университетининъ медицина институтында, Алият Узаирова Ставропольдеги патшалык медицина университетинде окыйдылар.
Асрет Абдурахманова Ногай район орталык больницасынынъ бас врачы Ф.Межитовага эм медицина куллыкшыларынынъ профсоюз организациясынынъ председатели З.Шугаиповага «Дагестанская медицинская династия» конкурсында Абдурахмановларга катнаспага себеплик тийгисткенлери уьшин уьйкен разылыгын билдиреди.
Биз Абдурахмановлардынъ врачлар династиясы аьли де коьп йыллар уьзилмей барганын эм олардынъ сырасында атаклы врачлар коьп болганын йораймыз.
Н.Кожаева.
Суьвретте: «Дагестанская медицинская династия» конкурсында савгалав мезгили.
