Дагестан Республикасынынъ Аькимбасы Владимир Васильев тамбыз айдынъ 27-нши куьнинде Россия Федерациясынынъ Конституциясына туьрленислер киргистуьв бойынша тавыс беруьвде катнасты. Баьри санитарлык-эпидемиологиялык талаплавларды толтырып, ол Махачкалада 1105-нши номерли сайлав участогында оьзининъ гражданлык ой-токтасын билдирди. Республика Аькимбасы журналистлердинъ соравларына да явап береятып, туьрленислер бойынша карарды кабыл этуьвдинъ маьнелигин белгиледи.

«Конституция кабыл этилген заманда, мен заьлим ясындагы аьдем эдим. Мен Совет Союзынынъ бузылганын эм сол зат аьдемлерге бек коьп кайгы эм кыйынлык аькелгенин коьрдим. Сол заманда бир зат та этип болмадылар. Россия аьдемлерге кыйын ак, пенсиялар тоьлеп болмады, акша йок эди. Халкларара валюта фонды бизге процентлерге кредит беретаган эди. Владимир Владимирович Путин властьке келгенше, элимиздинъ айлак коьп борышы бар эди. Бир кесек заманнан сонъ баьри борышлар тоьленди, – элимиздинъ аьлиги законынынъ болувынынъ тарихин эсине алып айтты Владимир Абдуалиевич.

РФ Конституциясына туьрленислердинъ киргистилуьви бойынша оьз ойын республика етекшиси булай деп бардырды: «Сол заманларда Конституцияга биз–социаллык патшалык деп язып, кайтип ол канагатланатаган йоллары язылмаган.

Аьли Президенттинъ, Патшалыктынъ карарларында, бизим бюджетте эпидемия аьллеринде аьдемлерге ярдам этуьв йорыклары каралган.