«Шоьл тавысы» (алдынгысы «Кызыл байрак», «Шоьллик маягы») республикалык газетасы оьз халкы ман бирге 92 йылдан артык заман келеди. Кайсы заманларда да онынъ мырады, ниети бирдей болган. Газетамыздынъ бетлеринде ногайымыздынъ тарихи, адабиаты, савлай маданияты, ясуьйкенлердинъ коьрим болган яшав эм ис йолы, ызгы йылларда согыс спецоперация озып турган ерде йигитлеримиздинъ коьрсеткен эрклиги эм Россия Аьскерининъ сыраларында тийисли куллык эткен аьскершилер, етимисли ясларымыз акында туьрли макалалар баспаланып шыгады. Солай ок районымызда расатаган маьселелер, эдаплык яктан туьрли соравлар коьтериледи. Бизим редакцияга яшавшылар язган хатлар да, разылыклар да аз туьспейди. Узын соьздинъ кыскасы, халк яшавы газета ман тар байланыслы демеге болады. Редакциядынъ куллыкшылары кызыклы макалалар аьзирлеп калмай, газетамызга халкымыздынъ ваькиллери язылувы ман байланыслы исти йылда эки кере бардырадылар. Сога коьре, язылув иси ийги оьтсе, биз ярым йылды уьстинликли озды деп санаймыз. Газетамыз халкымызга керекли эм халкымыз да оьз тилин эм маданиятын саклав йолында деп рахатланамыз.
Уьстимиздеги йылдынъ экинши ярым йылына газетамызга язылув иси де уьстинликли оьтти. Соны уьстинликли озгарар уьшин бизге оьзлерининъ коьмегин эткенлерге уьйкен савбол айтамыз. Олар – «Ногайский район» МР администрациясынынъ аькимбасы Джамалутдин Эсиргепов осал канагатланган 200 аьелге газетамыз еткерилсин деп карыж шыгарган, Район Депутатлар Йыйынынынъ председатели Рустам Байманбетов, Халк Йыйынынынъ Депутаты Мурзадин Авезов, Владимир Уразакаев, Россия МИД МГИМО алдышы илми куллыкшысы Ахмет Ярлыкапов, савлай район учреждениелери эм организациялары, Ногай район ясуьйкенлери, савда юритуьвшилер – «Стамбул», «Поиск», «Азалия», «Мир дверей», «Зеленый мир», «Гарант», «Азбар», «Модный дом», «Престиж», «Verda», «Батыр», «Кыпчак» туькенлер иелери, солай ок АЗС «ROSOIL», АЗС «Казбек» иелери, аптекадынъ иеси Джамиля Оразбаева, «Дослар ТВ» Ногай телевидениесининъ куллыкшылары, СВО катнасувшысы Арсен Ярикбаев, конъысы Кизляр, Бабаюрт, Тарумов районларынынъ яшавшылары. Соьйтип, Россия Муфтийининъ СКФО-дагы Дин управлениесининъ толы ыхтыярлы ваькили Рашид Акказиевке 20 мынъ маьнет акша, Альберт Тамакаевке 6 мынъ маьнет акша газетамызга язылув иси юрген заманда коьширгенлери уьшин айырым разылыгымызды билдиремиз. Бу йогарыда белгиленген баьри аьдемлер Дагестан Республикасында ногай тилинде баспаланатаган сынъар газетасына язылып, тилимиздинъ сакланувына оьз уьлисин косып, оьзлерин шынты патриотлар этип коьрсеткенлер. Эндиги йылларда да олар сондай ак ниетли исти бардырар деп сенемиз. Бу аьдемлер баскаларга тилин эм маданиятын саклаган, халкын да саклар дегенди коьрсетерлер. Районымыздынъ туьрли авылларынынъ яшавшылары да аьр дайым да газетамызга язылганлар, бизди коьтергишлегенлер. Тек оькинишке, йылдан йылга олар язылатаган газета саны азаяды, айтпага озган 2022-нши йыл Терекли-Мектеб авылынынъ яшавшылары 364 газетага язылган болса, уьстимиздеги 2023-нши йыл – 309-га язылганлар, Куьнбатар авылынынъ яшавшылары былтыр 71 газетага язылган болса, быйыл – 34 газетага язылганлар. Бу санларды мага тынышсызланув ман байланыста келтирмеге туьсти. Районымыздынъ яшавшылары язылатаган газеталар саны йылдан -йылга азайман, артса экен деп, баьри газета баспаланувына куьш салганлар кыйналады. «Шоьл тавысы» редакциясынынъ куллыкшылары ногай тилимизди балаларымыз билсин, билимли ногай ясларды, оьз Эли уьшин турган йигитлерди яшавшылар танысын деп, аьрекетлейдилер. Сиз де оьз шеретинъизде, ногай тилинде шыгатаган газета аьли де аьрекетлесин деп, оьз уьлисинъизди косынъыз.
Н.Кожаева.