Ногай район еринде газификациялав программасын яшавга шыгарув ман байланыста яшавшылардан 92 аьризелер туьскен.

Онынъ акында район администрациясында янъыларда оьткен йыйында «Ногайский район» МР администрация аькимбасынынъ ис борышларын толтырувшы Хамидулла Саитов билдирди. Онда авыл поселениелер аькимбаслары, республикадынъ эм районнынъ кайбир организациялар етекшилери, солай ок ямагат организациялар ваькиллери ортакшылык эттилер.
Х.Саитовтынъ соьзлерине коьре, муниципалитет ериндеги 400 уьйлер иелериннен газификациялав программасын яшавга шыгарув ман байланыста 92 аьризелер туьскен, олардынъ 88-и тергевлерден оьткенлер, а доьрт аьризе – тергелуьв уьстинде. Х.Саитов авыл поселениелер аькимбасларына бу соравга артык эс каратпага кереклигин белгиледи.
– Сиз бу куьн аьлинде турган маьнели сорав – газификациялав программасын яшавга шыгарув бойынша яшавшылар арасында анълатув хабарларын юритпеге, авыл яшавшылар ман ислемеге керексиз. Йылдынъ ызына дейим биз газификациялав программасын яшавга шыгарувды 100% дейим еткермеге керекпиз, – деп белгиледи Х.Саитов.
Армаган йыйын катнасувшылары Ногай районында Яшавшыларды ис пен канагатлав орталыгынынъ аьрекети мен таныстылар, онынъ акында организация етекшиси Рустам Такташев билдирди.
Онынъ айтувы ман, 22 куллыксыз гражданлар оькимет буйымлар ман канагатланган, солардынъ ишинде – уьш яслар ваькиллерине, сакатлыгы бар бир аьдемге, тыншаювга шыккан эки гражданларга эм 18 ясларына толмаган балалары бар 13 ата-аналарга. Р.Такташевтинъ белгилеви мен, Орталык пан берилген оькимет буйымлар аркасы ман 8 аьдем социаллык аьрекети бойынша оьз исин аштылар, солардынъ 7-ви оьзлери каьрлейдилер эм бир аьдем ИП ашкан.
– Оннан баска болып, бизим организациядынъ район УСЗН мен биргелесте район яшавшыларын социаллык контрактлар бойынша программаларга киритуьв бойынша уьйкен куллык юритилген. Йылдынъ басыннан алып социаллык контракт кебинде 31 аьдем социаллык коьмегин алган, солардынъ 25-и – оьз иси мен, 6-ы ИП мен каьрлейдилер, – деди Р.Такташев.
Йыйында, солай ок район Хатын-кызлар советининъ председатели Асият Манкаева район еринде «Тиллер тавы» деген документальлик фильм алынганы акында шыгып соьйледи.
Йыйыннынъ сонъында «Ногайский район» МР администрациясынынъ аькимбасынынъ ис борышларын толтырувшы Хамидулла Саитов Уллы Енъуьвдинъ 77-нши йыллыгын байрамшылав куьнлеринде уьстинликли куллык юриткенлери уьшин «Шоьл тавысы» республикалык газетасынынъ эм район администрациясынынъ спорт боьлигининъ бир неше куллыкшыларын Сый грамоталары эм Разылык хатлар ман савгалады.
Э.Кожаева, «Шоьл тавысы» республикалык газетасынынъ бас редакторы.