Янъыларда Россияда яшайтаган ногай миллет халкынынъ ваькиллери Шешен Республикасынынъ бас каласы Грозныйда конакта болып кеттилер. Шешен Республикасында яшайтаган ногайларыннан туьзилген миллет-культуралык автономиясынынъ ойы ман яшавга шыгарылган «Россиядынъ билдируьв-ыхтыярлык майданында ногайлардынъ катнасувы» деген тоьгерек столы Шешен Республикасындагы Финанслар министерствосынынъ конферец-залында йогары аьлде уйгынланып оьтти.

Тоьгерек столынынъ куллыгында ногайлар яшайтаган регионларыннан ямагат аьрекетшилери, коьлем билдируьв амалларынынъ ваькиллери эм автономиядынъ белсенли аьрекетшилери ортакшылык эттилер.
Шара катнасувшылары йолыгыста актуальли соравларын коьтердилер, боьтен де, ногай билдируьв ямагатынынъ оьрленуьвинде коьлем билдируьв амалларынынъ орынын белгиледилер. Журналист, ямагат аьрекетшиси, Шешен Республикасында яшайтаган ногайларыннан туьзилген миллет-культуралык автономиясынынъ председателининъ куллыгын кесек заманга юритуьвши Альфия Курганова оьз соьйлевинде билдируьвлер технологиялар оьмиринде социаллык тармагында исти белсенлендирмеге тийисли, неге десе Интернет – ол ямагаттынъ оьрленуьвининъ йолы болады, деп белгиледи.
Солай болып, миллет-культуралык автономиядынъ пресс-службасынынъ етекшиси, Шешен Республикасынынъ патшалык университетининъ студенти Загир Шольденн шыгып соьйледи. Ол, оьз билимлери мен боьлисе келип, коьлем билдируьв амалларынынъ аьрекети акында толысынша хабарлады, социаллык тармакларында аккаунтларды туьзуьвининъ негизли кезеклери акында айтты. Ол айырым эсти коьлем билдируьв амалларындагы билимлендируьв негизине де каратты, солай болып, ногай блогосферадынъ оьрленмеге кереги акында да айтып кетти.
Оннан сонъ шарадынъ барысында тоьгерек столынынъ катнасувшылары регионаллык эм биргелес озгарылаяк шараларынынъ бу ярым йылга планын карап шыктылар.
Шарадынъ барысында Ставрополь крайынынъ регионаллык ногай миллет-культуралык автономиясынынъ белсенли аьрекетшиси Булат Елманбетов Шешен Республикасында яшайтаган ногайларыннан туьзилген ногай миллет-культуралык ав- тономиясынынъ регионаллык ямагат организациясына миллет белгилери болган байракты эм омырав белгилерин эм, солай болып, тарихши В.Трепавловтынъ «Ногай Ордадынъ тарихи» деген китабин савга эсабында тапшырды.
Йолыгыстан сонъ шара катнасувшылары Ахмат-Хаджи Кадыровтынъ атындагы «Чечнядынъ юреги» деген межигитинде косылып намаз кылдылар эм калада экскурсияда болмага амал таптылар.

Суьвретте: Россияда яшайтаган ногай халкынынъ ваькиллери Шешен Республикасында оьткен йолыгыста.