«Аьскершиге хат» деген Савлайроссиялык акциясы эсабында янъыларда Шумлелик авыл орта мектебининъ окувшылары эм окытувшылары, солай ок россия аьскерлери юритип турган специальли согыс операциясында оьз увылы биринши куьнлерден катнасатаган завуч-уйгынлавшы Гульпияз Манапова Россия Армиясынынъ баьри де аьскершилерине каратылган хат-шакырув язган. Тоьменде биз согыс спецоперациясынынъ баьри де катнасувшыларына багысланып япсарсыз ана суьйимлигине толган хаттынъ иштелиги мен газета окувшыларын таныстырмага суьемиз.
«Аявлы Россия Армиясынынъ аьскершилери!
Сизге Дагестан Республикасынынъ Ногай районынынъ Шумлелик авылыннан окытувшы Гульпияз Гасановна Манапова язады.
Буьгуьн бизим мектебимиздинъ окувшылары «Аьскершиге хат» деп аталган Савлайроссиялык акциясында ортакшылык эттилер. Бизим аьскершилерди колтыклавга каратылган ийги соьзлерди сайластыра берип, уьйкен белсенлик пен хатлар язып баслаган окувшыларымды коьргенде, мен оьзим де сизинъ эрлигинъиз эм йигерлигинъиз, ян-коьнъил куватынъыз эм Тувган Элинъизге суьйимлигинъиз уьшин сизге йылы разылык соьзлеримди каратпага суьйдим.
Меним сизге хат язувымнынъ тагы бир маьнеси бар: мен де аьскершидинъ анасыман. Меним увылым – Магомед Манапов, ол да спецоперация оьтеяткан ерде оьзининъ аьскершилик борышын толтырады. Сиз – онынъ дослары эм йолдаслары. Мен сизи мен оьктемсиймен! Мен сизинъ ян берклигинъиз эм йигерлигинъиз алдында тизлериме шоьгемен. Элбетте, кайтип сизге авыр, кайтип сизге, аранъызда аьли бир кере де мыйыгын кырмаган кеделерге де согыс спецоперациясында катнасып, коьп йыллардан бери Украинадынъ Савытлы куьшлери топлары ман атып туратаган аьдемлердинъ яшавларын куткара берип, коьп сынавларды басларынъыздан кеширип турганынъызды анълайман. Сизге бир коршалавсыз калган яшавшылардынъ азап кайгысын, эм бир сырада болган йолдасларынъыздынъ оьлимлерин де коьрмеге туьскен. Ол баьри зат та коркынышлы. Болса да сиз аьскершилер. Сиз бу йолды оьзинъиз сайлагансыз. Сол йолды сиз басларынъызды йогары коьтерип эм таза намыс сезиминъиз бен оьтерсиз деп сенемен. Эм, элбетте, оьзинъизди сакланъыз. Сиз уьйлеринъизде кардаш-тувганларынъыздынъ эм ювыкларынъыздынъ, сизинъ балаларынъыздынъ, хатынларынъыздынъ, эм, элбетте, аналарынъыздынъ куьтуьвин эсинъизде тутынъыз! Оларга да енъил тувыл.
Мага, ана болган саялы, туьн арасында бирден кайдай да бир анъланмаган, юректи сызлаткан аварадан кара териге туьсип уянатаган сезим айлак та ювык. Калтыраган колларынъ ман телефонынъды излейсинъ, а, белкиси, кедемде байланыс шыккандыр эм ол смс язгандыр деп ойлап. А, белкиси, ога яман болаяткандыр! Яде сувыкта тонъып тургандыр, яде ол аш болган болса ша? Ким билсин, ойламага да коркынышлы, яраланып ятса ша? Не мен коьмек этпеге болар ога? Кайтип? Неге десе, ол неше ясына толган болса да сенинъ увылынъ ша. Юрек кесеклерге боьлинеди, коькиректен юлкынып ога карап ювырады, тек акыл анълайды: ол – узакта, ол – уьйкен эркек, ол – аьскерши. Тек сол заман куьшсизликтен… йок, йыламайсынъ, дува этип тилек тилеп баслайсынъ.
Мен Кудайдан бу зат тез арада кутылсын деп тилеймен. Еримизге ювык арада тынышлык келсин эм бизим увылларымыз, аданасларымыз, эрлеримиз, аталарымыз уьйлерине кайтсынлар деп тилек этемен. Соны баьриси де тилейтаганын билемен.
Бизим дуваларымыз сизди коршаласынлар.
Бизим ана суьйимлигимиз сизди куьллелерден эм баьри кыйынлыклардан сакласын.
Сиз тири эм аман-эсен кайтынъыз. Биз сизди аьр куьн эм аьр саьат сайын куьтемиз.
Сизди суьйип эм куьтип турган – ананъыз».
Бу хатты язган Гульпияз Гасановнадынъ увылы – Магомед Манапов Шумлелик авылында тувып-оьскен. Мектебти кутылган сонъ, ол Карашай-Шеркеш патшалык педуниверситетин де окып битирген. Окувдан сонъ уьйленген эм Уралга, Челябинск областине ислемеге кеткен. Соннан оны Россия Армиясы сырасына шакырганлар. Аьскершилик борышын толтырып уьйине кайткан, сонъында Краснодар крайындагы Анапа каласына куллык этпеге кетеди. Сонда ол 2 йылга аьскершилик борышын толтырмага контракт туьзген.
Украинада согыс спецоперациясы басланганда ок, оларды Херсон областине аькетедилер. Буьгуьнлерде Магомед Манапов сонда водитель болып эр борышын толтырады. Мектеб директоры, Ногай район Депутатлар йыйынынынъ депутаты Омаргаджи Шахбанов айтканлай, Магомед куллык этетаган аьскер боьлигининъ командири оны ийги, нызамлы эм бавырмалы аьскершилердинъ бириси деп санайды. «Ол ушыны ман да коьримли, яваплы гражданин, аьр заман да аьдемлерге коьмекке келмеге аьзир болып тербияланып оьскен, буьгуьнлерде болса, йигерли солдат, Тувган Элининъ шынты патриоты болды», – дейди Магомедтинъ акында Омаргаджи Шахбанов.
Суьвретлерде: Гульпияз Манапова; онынъ увылы Магомед Манапов.
