Оьткен каты куьн бизим республикада КОВИД-19 инфекция ман авырып, больницага туьскен эм больницага туьспеген пневмония ман авырувлы 6 аьдем белгили болганы билдирилди ДР Савлык саклав министерствосынынъ прессслужбасы ман.

Коронавируслы инфекциясы барлыгы лаборатория ман белгиленип, 22 аьдем де регистрацияланган. Озган юма ишинде Россия Савлык саклав министерствосы ман озган селекторлык кенъесте федераллык экспертлер РФ еринде авырув куьшейип басланган аьллерде яшавшыларды коршаламага керегин белгиледилер. – Айырым эс каратпага керек бизим гражданлардынъ иммунный коршалавына. Бу яктан оьз пайдалыгын коьрсетти КОВИД19 инфекциясыннан вакцина эсабында кулланылган «ГамКОВИД-Вак» препараты. Заманында эттирилген вакцинация коьплердинъ, боьтен де хронический авырувлары барлардынъ эм эслилердинъ яшавын аман саклар, – деди РФ савлык саклав министри Михаил Мурашко. Дагестан еринде пандемия басланганнан алып аьлиге дейим 1585746 аьдем вакцинация процедурасын оьткенлер. – Дагестаншылардынъ эсин каратпага суьемиз: 6 айлар артта вакцинация оьткен болсанъыз, аьли, пандемиядынъ янъы толкыны алдында, сизде организмде КОВИД-ке карсы антитела кеплевге эп бар, оьз савлыгынъызды, а, белки, яшавынъызды саклав уьшин! – деп билдиредилер ведомствода. Вакцинация оьтпеге ярамайтаганлар уьшин республика поликлиникаларына «Эвушелд» деген препарат аькелинген (ол коронавируслы инфекциясынынъ алдын шалады).