Янъыларда ДР Оькиметининъ Председателининъ биринши орынбасары Нюсрет Омаров Дагестан Республикасында Савлайроссиялык халк санын язып алувын озгарув бойынша комиссиясынынъ кенъесин озгарды.
Нюсрет Омаров Савлайроссиялык халк санын язып алувы уьстимиздеги 2021-нши йыл озгарылаягын билдирди. Дагестан Республикасы Россия Федерациясындагы савлайроссиялык халк санын язып алувы эки кезекте оьтеек коьп болмаган субъектлерининъ бириси болады. Маьнели шарадынъ биринши кезеги уьстимиздеги йылдынъ 1-31-нши июлинде озгарылаяк, сол заманда республикамыздынъ катнаспага кыйын ерлерде туратаганлардынъ саны язылынып алынаяк.
– Бу куьнге Савлайроссиялык халк санын язып алувы бойынша комиссиялары республикамыздынъ баьри калаларында эм муниципаллык районларында туьзилгенлер, – деди ол.
Республикамыздынъ узак эм бармага, келмеге кыйын ерлеринде туратаганлардынъ санын язып алув кенъесте айырым сорав болып каралды. Нюсрет Омаров билдиргенлей, сондай ерлерде туратаганлардынъ санын язып алув шарасын уйгынлав амаллары акында соравлар каралган, солардынъ сырасында – яшавшылар акында билдируьвлер йыйнавды толтырув, коьликлер мен аьдемлерди керекли ерлерге, солай ок переписной кагытларды еткеруьв.
– Узак эм катнаспага кыйын ерлерде орынласкан авыллардынъ саны республикамызда 154-ке етеди, олар – 6 муниципалитет районларынынъ авыллары, айтпага, Ахтын, Докузпарин, Рутул, Тлярата, Цумада, Цунтин эм Бежтин участогы, – деп белгиледи Н.Омаров.
Савлайроссиялык халк санын язып алувга аьзирлик коьруьв куллыклардынъ толтырылувы акында ДР бойынша патшалык статистикасынынъ Федераллык службасынынъ Ерли органынынъ етекшиси Айганат Эфендиева айтты. Онынъ соьзлери мен, уйгынлав планга келисли, республикадынъ узак эм катнаспага кыйын ерлеринде 24 переписной, сол кадер стационарлык эм 152 счетный участоклар уйгынланган. А.Эфендиева белгилегенлей, республика Савлайроссиялык халк санын озгарувга аьзир.
Кенъес бойынша Дагестаннынъ узак эм катнаспага кыйын ерлеринде орынласкан районларынынъ Савлайроссиялык халк санын язып алувга аьзирлиги акында район аькимбаслары билдирдилер.
