Ызгы куьнлерде Дагестан Республикасында, айырып айтканда, уьйкен калалар – Махачкалада эм Хасавюртта Россия Президенти Владимир Путиннинъ тапшырувы ман басланган толы болмаган мобилизацияга карсы акциялар оьтти. Дагестанлылар аьр заманда да йигитлиги мен баскаланганлар. Буьгуьнлерде Махачкала эм Хасавюртта болып турган оьзгерислер дагестанлылардынъ касиетлерине усамайдылар. Бу оьзгерислерди кулакка кирип болатаган деп айтып болмаймыз. Баьри регионларда да мобилизация парахат оьтип туры, тек биз, дагестанлылар, оьзимизди эрши яктан коьрсеттик. 1999-ншы йылда Дагестан Республикасына карак туьркимлер киргенде, ким бизге коьмекке келди? Россия оьз колын созды бизге сол заман, ян-яктан бизге ярдам келди.

Неге буьгуьн НАТО аьскерлери Россиядынъ япсарларынынъ туьбинде турганда, Украинады 80 йыл артта бизим ата-бабаларымыз бан енъилген нацистлер бузгыншылап турганда, дагестанлылар биргелесип, элимиздинъ басшысын коьтергишлеп болмайдылар? Куьнбатар элининъ кир ниети сондай да куьшли болган ма экен, эгер бизим яслар оларга карсы турып болмаса? Меним ойыма коьре, ата-аналар, ясуьйкенлер балалар ман соьйлев керек. Боьтен де, аталар анълатув керек ясларга – дагестанлылар бир де коркаш болмаганлар, эр кисилер Элин, уьйин, аьлейин коршалавшы болмага керек. Дин аьрекетшилери де оьз куллыгын белсен юритсе экен бу соравда. Аьр бир межигитте эр кисилер Аталыкты саклав эм коршалав кереги акында айтылса экен.
Мен, согыс аьрекетининъ ветераны, Дагестан эм Шешен Республикаларында болган согыслардынъ катнасувшысы, дав деген не экенин, кайтип карак туьркимлер кара ниетин коьрсеткенин коьзим мен коьргенмен. Мен яс дагестанлыларга Куьнбатар элиннен, Украинадан келген шакырувларга ынанманъыз деп тилек саламан, шакыраман. Сизинъ аьли билмей, анъламай эткен ислеринъиз уьшин танълагысы куьн балалар алдында уят болар. Тарихте баьри зат та калады – ким намысы ман яшаган эм кимде намыс калмаган.
Э.Кожаева,
«Шоьл тавысы» республикалык газетасынынъ бас редакторы.