Дагестан Республикасына ис йорыгы ман келген РФ Оькиметининъ Председателининъ орынбасары – РФ Президентининъ Алыс Куьнтувар федераллык округындагы толы ыхтыярлы ваькили Юрий Трутнев ДР Аькимбасынынъ куллыгын юритуьвши Сергей Меликов пан бирге республикадынъ социал-экономикалык оьрленуьв соравлары бойынша кенъес оьткерген.

Юрий Трутнев кенъести баслаятып, Сергей Меликовты Дагестан Аькимбасынынъ куллыгын юритуьвши этип беркитилгени мен байланыста оны кутлады. «Республикадынъ оьрленуьви уьшин аьруьв шартлар туьзуьв эм аьдемлердинъ яшавын ийгилендируьв мен байланыста бу ис аьрекети Сиз уьшин йогары сенимлик эм уьйкен амаллар болады.

Сергей Алимович бу борышларды яшавга шыгарув уьшин оьзининъ бай ис сулыбын кулланар деп сенемен», – деп билдирген ол. Оьз ягыннан ол Россия Оькимети регионга керек шаклы ярдам береегин айтып беркитти.

Юрий Трутнев кенъестинъ бас маьнеси – ол Россия Оькиметининъ эм республика власть органларынынъ оьлшеминде энъ де маьнели эм илгериге ымтылган борышларды белгилемеге уьшин регион ман куллык этуьвдинъ бас йолларын токтастырув экенин анълатты.

Сергей Меликов оьз ягыннан РФ Оькиметининъ Председателининъ орынбасарына республикага келгени уьшин разылыгын билдирди. Соны ман бирге ол Дагестан тек куры федераллык орталыгынынъ коьмегине сенип олтырмай, оьз резервлерин де излестиреегине эм кулланаягына сендирди. «Дагестанда республикады оьрлентуьв эм регионнынъ социал-экономикалык аьллерин, аьр бир аьдемнинъ яшав сапатын ийгилендируьв бойынша уьйкен амаллары бар. Тек куьшлерди дурыс кепте бирлестируьв, солардынъ амалларын, сонынъ эсабында финанс амалларын дурыс кебинде уьлестируьв, элбетте, сизи мен байланыслы. Сол яктан биз сизинъ, Россия Федерациясынынъ, бу соравлар ман каьр шегетаган негизли минис-терстволардынъ бизге демевлик этеегине сенемиз», – деген Дагестан Аькимбасынынъ куллыгын юритуьвши.

Кенъесте ДР Оькиметининъ Председатели Артем Здунов катнасты эм Дагестан Республикасынынъ социал-экономикалык оьрленуьви эм экономикалык оьрленуьв абытларын ийгилендируьв бойынша коьрилетаган шаралар акында билдирди. Онынъ айтувы ман, юритилген куллыклар, федераллык орталыгынынъ колтыклавы аркасы ман ортакластырылган бюджет оьлшеми 1,6 кере арткан, аьли онынъ оьлшеми 2020-ншы йылда 178,4 миллиард маьнет болган.

Кенъесте ДР Аькимбасынынъ эм Оькиметининъ администрациясынынъ етекшиси Владимир Иванов, регионаллык министрлер кабинетининъ агзалары ортакшылык эттилер.