Озган юмадынъ ишинде Махачкала каласында «Россия – меним тарихим» паркында «Янъы цифровой аьллеринде региональли коьлем информационлык амалларынынъ аьрекети» деп аталган СМИ форумы Дагестан Республикасынынъ министерствосынынъ уйгынлавы астында озды.
Биринши куьн ДР Аькимбасы Сергей Меликовтынъ пресс-конференциясы озды. Регион басшысы федеральли эм региональли СМИ ваькиллерининъ соравларына яваплады. Республикамыздынъ социал-экономикалык яктан оьрленуьвине, ямагат маьселелерине эм байыр темаларга каратылган эди. Бу оьзгерис бойынша оьз ойы ман «Шоьл тавысы» республикалык газетасынынъ бас редакторы Эльмира Кожаева боьлисти.
– Сергей Меликовтынъ пресс-конференциясы 2021-нши йылдынъ сырагыларын келтируьвге багысланган эди. Шарада федеральли эм региональли коьлем информационлык амалларынынъ 80 журналистлери катнасты. Солардынъ ишинде мен бизим яс ис йолдасымыз, «Дагестан» РГВК телеканалынынъ яс корреспонденти Сааб Азизовты белгилемеге суьемен, ол Дагестан басшысына соравлар берди.
Яс журналисттинъ айтувы ман, республика бойынша коьплеген балалар уьшин майданлар курылады, ама олар онъайлы тувыл эм коьпке дейим болмайдылар. Сааб Азизов сондай проектлерди басыннан алып ызына дейим тергейтаган балалар эксперт советин туьзуьв керек деген маслагат берди. Сергей Меликов бу соравды каравда РФ Госдумасынынъ депутаты Бийсултан Хамзаевке катнаспага тапшырув этти, неге десе онынъ етекшилеви астында регионда балалар уьшин майданлар эм воркаут-майданлар курылады. Сергей Алимовичтинъ айтувы ман, Б.Хамзаевке балалардынъ эм яслардынъ ойлары кызыклы эм маьнели.
Бийсултан Хамзаев сол куьн ок яс журналисттинъ оьз коьмегин бермеге суьйгенин хош коьрип алды. Экинши куьн Сааб Азизов РФ Госдумасынынъ депутатынынъ энъ де яс коьмекшиси болды.
Оькинишке, биз неше де балалардынъ оьзлерин яман юриткенин де коьргенмиз, болса да Сааб Азизов коьплегенлерге ийги коьрим болады. Дагестаннынъ келеектегиси – сенимли колларда. Бизим балалар коьплеген савлайроссиялык, республикалык конкурсларда енъуьвши болып шыгадылар, оьз оьнерлерин туьрли тармакларда коьрсетедилер. Талаплы балалардан туьзилген эксперт советин туьзуьв балалыкты коршалав республикалык программаларында бек ийги абыт деп ойлайман, – деп айтты Э.Кожаева.
