Озган юма, 30-ншы сентябрьде, Махачкалада Дагестан Республикасынынъ 7-нши кере шакыртылган Халк Йыйынынынъ депутатларынынъ 1-нши сессиясы болып оьткен. Сессияда уйгынлав соравлары каралган.

Республика парламентининъ депутатлардынъ ясыртын кепте тавыславынынъ сырагысында ДР Халк Йыйынынынъ Председатели этилинип «Единая Россия» партиясынынъ фракциясынынъ агзасы Заур Асевович Аскендеров сайланган. Онынъ кандидатурасы уьшин сессияда бар болган 87 депутаттынъ 82-си тавысларын берген.
Сессияда катнаскан Дагестан Аькимбасынынъ куллыгын кесек заманга юритуьвши Сергей Меликов Заур Аскендеровты кутлаган эм сол ис орыны сыйлы эм яваплы экенин белгилеген.
Сессиядынъ барысында янъы парламенттинъ туьзилиси беркитилген, ДР Халк Йыйынынынъ Председателининъ орынбасарлары, комитетлерининъ председательлери де сайландылар.
ДР Халк Йыйынынынъ Председателининъ биринши орынбасары деп Юрий Левицкий, орынбасарлары деп Сайгидахмед Ахмедов пан Камил Давдиев беркитилдилер.
Республикадынъ янъы парламентининъ сырасында баьриси 9 комитетлер белгиленгенлер эм солардынъ етекшилери де сайланганлар.
Дагестан Республикасынынъ Халк Йыйыныннан Россия Федерациясынынъ Федерация Советине сенатор этилинип бу йол да Сулейман Керимов айырылды.
ДР Халк Йыйынынынъ кезекли сессиясы 14-нши октябрьде оьткерилеек деп белгиленген эм сонда Дагестан Республикасынынъ Аькимбасы сайланаяк.
Суьвретте: ДР Халк Йыйынынынъ Председатели Заур Аскендеров.