Оьткен март айы уьшин «Медиалогия» оьткерген Россия губернаторларынынъ медиарейтингининъ сырагылары бойынша Сырт-Кавказ федераллык округынынъ регионларынынъ етекшилери арасында Шешен Республикасынынъ Аькимбасы Рамзан Кадыров, Ставрополь крайынынъ губернаторы Владимир Владимиров эм Дагестан Аькимбасы Сергей Меликов алды орынларды алганлар.

Проект март айында Дагестан етекшисининъ рейтингинде тоьмендеги оьзгерислер блогы маьнели болганын белгилеген.
Россия Президенти Владимир Путин дагестанлы Нурмагомед Гаджимагомедовка Россия Баьтири деген атты оьлгеннен сонъ беруьв акында карар алган. Сол куьнлерде Дагестан Аькимбасы Сергей Меликов Украина ериндеги спецоперация заманында ян берген тамада лейтенант Нурмагомед Гаджимагомедовтынъ кардаш-ювыкларына бассавлыгын билдирген.
Дагестан Аькимбасы Сергей Меликов Донбассты коршалав бойынша юритилетаган спецоперация аьсеринде ян бергенлердинъ аьеллерине коьмек этуьв фондын ашувды демевлеген.
Март айында Меликов солай ок «Дагдизель» заводына карсы киргистилген санкцияларыннан тура оьз ойын айтып билдирген.
Дагестан власть органлары Каспийск каласында курылып турган мектеб курылысын йылдынъ ызына дейим кутармага соьз бергенлер. Сол окув ошагынынъ янында солай ок балалар бавы да курылады деп билдирген Сергей Меликов.
Республика етекшилери ерлерди комплексли оьрлентуьв программасы бойынша уьш калалардагы бузылмага турган турак уьйлерден яшавшыларды коьширмеге ниет этедилер. Сонынъ акында Россия курылыс министерствосынынъ ерлерди комплексли оьрлентуьв департаментининъ директоры Мария Синичич Дагестан Аькимбасы Сергей Меликовтынъ ортакшылыгы ман оьткерилген конференцияда билдирген.