Дагестан Республикасынынъ Аькимбасы Сергей Меликовтынъ етекшилиги мен республика Оькиметинде оьткен йыйында онынъ янъыртылган сырасы беркитилген.
Сергей Меликов сонда, Оькиметтинъ янъы сырасы туьзилеятканда, озган 2021-нши йылдынъ ис сырагылары да эсапка алынганын билдирген.
«Дагестанда бирерде ис орынлары аьдемлер уьшин этилинетаган болган. Ис орынлары, статус, кабинетлер, машиналар – аьдемлер уьшин берилгенлер. Буьгуьн ондай аьдет тайдырылган. Эндигиси аьдемлер борышларды толтырув уьшин сайланып алынаяклар», – деген Меликов.
Дагестан Аькимбасынынъ эм Оькиметининъ янъыртылган структурасы акында айта келип, регион етекшиси «аьр заманда борышларды хайырлы кепте толтырып уьлгирмейтаган уьйкен управлениелер тайдырылган», – деп белгилеген.
ДР экономика эм территориаллык оьрленуьв министри Руслан Алиев ДР Оькиметининъ Председателининъ Биринши орынбасары этилинип беркитилген. Соны ман бирге ол оьз ведомствосын да басшылаяк. Солай ок Манвел Мажонц та Биринши вице-премьери ис орынын бийлеген. Республикадынъ Биринши вице-премьери болган Нюсрет Омаровты С.Меликов ДР Халк Йыйынына Дагестан Аькимбасынынъ ваькили этип йиберген.
Солай ок доьрт министерстволарда министр- лери авыскан. Дагестан ис эм социаллык министерствосын – Абдурахман Махмудов, ДР табиат ресурслары эм экология министерствосын – Ибрагим Ибрагимов, ДР коьлик министерствосын – Джамбулат Салавов эм ДР цифра оьрленуьв министерствосын Юрий Гамзатов етекшилегенлер.
Оьзге баьри министрлер де оьз ис орынларда калганлар.
Соны ман бирге ДР курылыс министерствосына косымша эсапта архитектура бойынша комитетининъ эм ДР турак уьй-коммуналлык хозяйство ис борышларын да бергенлер.
Муннан алдын ЖКХ борышларын республикадынъ энергетика министерствосы толтыратаган эди. Сол ок заманда энергетика министерствосына Тарифлер бойынша комитетининъ ис борышлары тапшырылган. Ведомстводы Ризван Мурадов етекшилеген.
Заур Эминов ДР Оькиметининъ вице-премьери болып беркитилген, ол солай ок ДР ер эм муьлк катнасувлар министерствосын да басшылайды.
Тагы да доьрт ДР вице-премьерлери беркитилгенлер. Олар ким десенъиз, алдын ДР Оькиметининъ Председателининъ орынбасарлары болып куллык эткен Рамазан Джафаров, Муслим Телякавов эм Мурад Казиев эм янъы вице-премьер Ризван Газимагомедов.
Солай ок ДР информация эм баспа министерствосы ДР информация эм баспа агентствосына айландырылган.
