Янъыларда Санкт-Петербургта тамамланган XXV Халклар ара экономикалык форумы акында Дагестан Республикасынынъ Аькимбасы Сергей Меликов оьз ойын айтып билдирген.

– Куьнбатар эллери Россияды муьйиске тыгып, онынъ экономикасын бузып, халк арасында арасува тувдыраяк болып шалыстылар. Тек соннан пайда шыкпады. Аьли бизим рыноктан кеткен производстволар орынына янъылары шыгадылар, инфляция оьлшеми тоьменлейди, Россия оьзи болса технологиялык суверенитетине кенъ абытлап барады. Президент тувра белгиледи: Россия баска эллерден кораланатаган йол ман бармаяк, кене де бизи мен бирге ислемеге суьетаганлар ман катнасувларымызды кенъейтеек. Ол зат себепсиз тувыл, неге десе биз Дагестан уьстиннен оьтетаган эм Россияды бизге дос болган патшалыклар ман байланыстырмага болатаган «Сырт-Кубыла» саьнесине эс беремиз. Туризм тармагы да армаган оьрленип бараяк. Владимир Владимирович Путин белгилегенлей, элимиздинъ ишиндеги туристлер топары быйыл 12 миллион аьдемнен артпага каралады. Дагестан оьзининъ аьлемет ыспайы коьринислери мен бу коьрсетимге етисуьвге заьлимдей уьлисин косар деп сенемен.
Бизим элимиз тек коьп санлы санкцияларды тийисли кепте оьтуьв тувыл экеш, ама соны ман бирге россиянлыларды колтыклавды арттырмага да амал тапты. Буьгуьнлерде Президент льготалы ипотека бойынша ставкады 7 процентке дейим тоьменлетпеге, бизнести коьп санлы тергевлерден босатпага эм балалы аьеллерге коьмек этпеге тапшырды.
Бу баьри тапшырмалар да Дагестан уьшин бек маьнели эм бизим профильли министерстволар соларды эндиги аьзирлеп баслайдылар.
Дурыс, дуныя эндигиси алдынгыдай болмаяк, ама бизим уьшин сондай туьрленислер ийги якка абытлар боладылар. Мен патшалыгымыздынъ етекшисининъ: «Биз – куьшли аьдемлер эм кайдай туьрли борышты да шешермиз», – деген соьзлерин тагы да бир йоьплеймен, – деген Дагестан Аькимбасы Санкт-Петербургта тамамланган Халклар ара экономикалык форумы акында.