Дагестан Аькимбасы Владимир Васильев хатын-кызлар байрамы алдында Махачкаладагы Дослык уьйинде республикадынъ оьрленуьви уьшин ис косымларын эткен кыскаяклыларга Россиядынъ эм Дагестаннынъ патшалык савгаларын тапшырган. Шатлыклы шарада дагестан парламентининъ етекшиси Хизри Шихсаидов та ортакшылык эткен.

Шарады аша келип, Владимир Васильев республика хатын-кызларына олардынъ шыдамлыгы, иси, акылбалыклыгы уьшин разылык билдирди: «Кыскаяклылар ямагатта аьр дайым да тынышлыкты саклап келгенлер. Тарихте неше кере эрлер согыспага турган аьсеринде хатынлар сондай аьлди де туьзеткени акында белгили. Буьгуьнлерде де хатын-кызлар акыллыгын эм баьриси акында да каьр шегуьвин коьрсетедилер, олар сонынъ уьшин савболсынлар».

В.Васильев Дагестанда коьп йоллар бойынша уьйкен куллык юритилетаганы эм сол ис дагестанлылардынъ яшав сапатын арттырмага заьлимдей амал беретаганы акында хабарлады. Онынъ ойына коьре, сол куллыкта кыскаяклылардынъ туткан орыны бек уьйкен, сонынъ санында бу залда олтырганлардынъ да: «Мунда туьрли кеспили хатынлар йыйылганлар, олар оьз ислериннен баскалай, тагы да уьйкен ямагат куллыкларын да юритедилер эм сол зат уьшин оларга савболсын айтаман. Сиз уьстинликлерге, сыйга етискенсиз – кайсы ерде де баскаларга коьрим эм бизим ямагатымыз уьшин сенимли кепте ислеп болувынъызды коьрсеткенсиз».

Туьрли савгалар 28 хатынларга тапшырылды. Соьйтип, РФ савлык саклав куллыкшыларынынъ профсоюзынынъ Дагестан Республикалык организациясынынъ председатели Зумруд Бучаева «РФ ат казанган врачы» деген сыйлы ат пан савгаланды. «ДР-нынъ социал-экономикалык оьрленуьвине косымы уьшин» медальлер мен ДР Халк Йыйынынынъ Аграрлык политикасы бойынша комитетининъ председатели Асият Алиева, дагестан парламентининъ председателининъ орынбасары Елена Ельникова, «Дагестаннынъ кыскаяклылар союзы» ДРОО председатели Интизар Мамутаева белгилендилер.

Шарадынъ барысында солай ок туьрли тармаклар бойынша сыйлы атлар, Дагестан Республикасынынъ Сый грамоталары эм Дагестан Аькимбасынынъ Разылыклары да шатлыклы аьлде тапшырылдылар.

Сол куьн «Дагестан Республикасынынъ муниципаллык службасынынъ ат казанган куллыкшысы» деген оьрметли ат пан «Ногайский район» МР муниципаллык службасынынъ куллыкшысы, ясы етпегенлер ислери бойынша административлик комиссиясынынъ яваплы секретари Зухра Сулеймановна Аджиманбетова да савгаланды.