Дагестан Республикасынынъ Халк Йыйынынынъ кезекли 20-ншы сессиясында республика Оькиметининъ Председатели Абдулмуслим Абдулмуслимов эсап беруьв доклады ман шыгып соьйлевинде оьткен 2022-нши йыл элимиз эм республикамыз бойынша США эм Куьнбатар эллерининъ Россияга карсы салган экономикалык санкцияларыннан себеп авыр аьллерде озганын белгилеген. Соннан себеп ДР Министрлер кабинетининъ бас аьрекети экономикадынъ сенимли кепте оьрленуьвин эм социаллык онъайлыкты колтыклавга каратылды. Айткандай да бар, элимиздинъ эм республикамыздынъ етекшилери сондай кыйын аьллерге карамастан, экономикадынъ тоьменлевин иркип калмай, солай ок сонынъ армаган оьрленуьвин де канагатлаганлар.
Алды йол ман республика етекшиси Сергей Меликовтынъ баславы ман экономикадынъ сенимли кепте оьрленуьвин канагатлав уьшин Оперативлик штабы туьзилди. Сонынъ юма сайын йыйынларында кризиске карсы шаралар туьзилдилер эм яшавга шыгарылып басландылар. Республика экономикасы эм яшавшылар уьшин налог льготалары, льгота займлар, кредитлер берилди, киши предпринимательство уьшин налог оьлшемлери кемитилди эм солар баьриси бирге ийги сырагыларын бергенлер.
«Йыл сырагылары бойынша промышленность производствосы 108,5 %, авыл хозяйство продукциясы – 101 %, курылыс – 100,7%, савда айланысы – 101,5%, яшавшыларга акы тоьленип этилинген ярдамлар оьлшеми – 103,1 % етискен. Экономика аьрекетининъ негизли туьрлилери бойынша ярдамлар эм товарлар шыгарув индекси 2,2 % болган», – деп билдирген Абдулмуслимов.
Регионымыздынъ азык-туьлик кавыфсызлыгын канагатлав бойынша заьлимдей ислер этилинген. Сонынъ тамамында Дагестан элимиз бойынша дуьги, юзим, эт, суьт, юн болдырув яктан алдышы орынларды алады. Мысалы, эт эм юн болдырув бойынша республикада бас регион деп Сырт як, сонынъ санында бизим Ногай районымыз саналады. Район еринде, айтпага, 400 мынъга ювык койлар эм 30 мынънан артык тувар мал сакланады. Малшылык районымыздынъ авыл хозяйство продукциясынынъ толайысы производствосында 76 процент, эгиншилик – 24 процент болады.
Оькимет етекшисининъ соьзи мен, республика баьри де 13 миллет проектлеринде катнасады, сонынъ эсабында бизде 52 регионаллык проектлери де яшавга шыгарылады. Соларга деп былтыр 33 млрд. маьнет акша йиберилген. Бу коьрсетим 2021-нши йылдыкыннан коьпке ийги, неге десе 2021-нши йыл белгиленген акшадынъ тек 72 проценти кулланылган.
Премьер-министр 2022-нши йылдынъ энъ маьнели карарларынынъ бириси деп республика парламентининъ депутатлары ман Дагестан Республикасынынъ 2030-ншы йылга дейим регионнынъ социал-экономикалык оьрленуьвининъ стратегиясы кабыл этилингенин айтты.
Абдулмуслим Абдулмуслимов солай ок аьзирленген Дагестан Республикасынынъ оьрленуьвининъ экономикалык модели эсабында 5 маьнели инвестиционлык проектлери яшавга шыгарылувын да белгилеген.
М.Юнусов.
Дагестан Оькимети йыл сырагыларын келтирген
![](https://golosstepi.ru/wp-content/uploads/sites/7/sites/7/2023/03/43c85383-873b-4308-a249-6de38ace1c7b.jpeg)