Дагестан Аькимбасы Сергей Меликов Ростуризм етекшиси Зарина Догузова ман йолыгысты. Йолыгыста республикадынъ туризм тармагынынъ аьлиги аьли эм армаганда оьрленуьв соравлары ойласылып каралды.

– Дагестан оьткен йылдан алып, туристлер арасында сыйы болып, мунда коьп туристлер келуьви мен белгили. Быйыл май байрамлары куьнлеринде республикамызга келген туристлер саны Кавказда аьдеттегидей дайым да бу яктан алдыда болатаган Минеральные Воды ериннен артады. Буьгуьнлерде, сол затты эсапка алув ман, бизге бирге туристлик эм оны канагатлайтаган инфраструктурады тезлик пен оьрлендируьв уьшин баьри куьшимизди салмага керек, – деп белгиледи Ростуризм етекшиси.
Сергей Меликов федераллык ведомствога Дагестанды туьрли категориялы туристлер келип болувына эп беретаганы уьшин оьз разылыгын билдирди. Ол солай ок Дагестан туристлерди оьзине ярасык табиаты ман, этносы ман, туьрли миллет аслары ман тартатаганын белгиледи.
Йолыгыстынъ сырагысында Дагестан Республика Оькимети, Туризм бойынша федераллык агентствосы, FUN&SUN эм «Интурист» туроператорлары ара келисуьвге кол салынды.
Сергей Меликовтынъ айтувы ман, буьгуьнги йолыгыс эм Дагестан Республикасынынъ Оькимети, туризм мен байланыслы ведомстволары ман биргелес аьрекет этуьв акында кол басылып беркитилген уьш яклы келисуьв республикага косымша туристлер келуьвине уьйкен себеплигин тийгистеек, ол зат сырагысында регионда социал-экономикалык аьлди ийгилендиреек.
– Дагестанда туризмди оьрлендируьв мунда тыншаювга келетаганлардынъ оьзлерине де уьйкен суьйиниш. Тек оьткен йыл ишинде бизим республикамызда миллионнан артык туристлер болып кеттилер, тав ерининъ пейзажын коьрип эм сукланып. Бар Дагестан еринде ети аьлеметликлер: Сулак каньоны, Хунзахтагы водопадлар, Ахты авылында данъклы патша амамлары, Сары-кум эм, оьзек те, бурынгы Дербент. Биз туристлерди тек Дагестаннынъ тав ерлеринде тувыл, бизим кенъ тоьселип яткан Ногай шоьллигинде де куьтемиз. Мундагы кумлаклар ман узаклыкка созылган шоьл йолларында сиз оьзинъизди экстремал этип сезбеге боласыз, авто эм моторалли озгармага да эп бар. Бизде, Ногай районында, ийги ярастырылган каралдысы ман онъайлы «Конак Уьйи» де бар, а онынъ иеси сизге каралдыда сакланатаган туьелерди, туьекусты (страус) эм баска шоьл айванларын эм кусларын коьрсетер.
Дагестаннынъ Аькимбасы Сергей Меликов республикада туризмди оьрлендируьвге уьйкен эс каратады, сонынъ уьшин ога дагестаншылар атыннан – уьйкен разылык. Буьгуьн тавдагы эм шоьлдеги аьр уьй туристлерди конаклар эсабында хош коьрип алмага аьзир. Коьп конаклардан эситкеним бар дагестаншылардынъ конаксуьерлиги акында. Сонынъ уьшин, сыйлы конаклар, келинъиз бизге, шыдамсызлык пан бек куьтемиз сизди!
Эльмира Кожаева, «Шоьл тавысы» республикалык газетасынынъ бас редакторы.