Газетамыздынъ быйыл апрель айындагы номеринде биз Ногай районынынъ Терекли-Мектеб авылынынъ яс яшавшысы, А.-Х. Джанибеков атындагы орта мектебининъ окувшысы Аман Саитовтынъ оьткен 2021-нши йылда шатраш ойыны бойынша окувшылар арасында Россия чемпионы болганы акында язган эдик. Янъыларда редакциямызга Аман ман байланыслы тагы бир суьйинишли хабар келди.

Яс авылдасымыз эндиги июль айынынъ басында Махачкалада Дагестан Республикасынынъ балалар эм яслар арасында шатраш ойыны бойынша болып оьткен чемпионатында катнасып, сырагысында йогары орынды алган эм Дагестан чемпионы деген сыйлы атты казанган.
Районымыздынъ эм халкымыздынъ тарихинде шатраш ойыны бойынша сондай йогары орынларга етискен аьдемлер бек аз, Россия чемпионы деген атты бирев де казанмаган. Сол себептен яс авылдасымыздынъ уьстинлиги биз уьшин уьйкен спорт етимислердинъ бириси демеге керекпиз.
Аманды сондай бийик спорт савгасы ман кутлаймыз. Ога алдыда муннан да йогары уьстинликлерди, дуныя эм Олимпиада чемпионы болып, халкымыздынъ ийги атын айттырганын йораймыз!
М.Ханов.
Суьвретте: Аман Саитов