Янъыларда Махачкалада ДР Аькимбасы Сергей Меликовтынъ етекшилиги астында Дагестан экономикасын яклав бойынша оперштабтынъ кенъеси болып озды.

Кенъес сырагылары бойынша Сергей Меликов оьзининъ телеграм-каналында бас тезислерди белгиледи.
«Энъ маьнелиси – экономикалык аьрекети мен басшылав, баалар оьсуьвине эм товарлар кытлыгына тергев салув. Куьн сайын баалар эм товарлар кытлыгына мониторинг озгарылады, конъысы районларыннан товарлар ман канагатлавшылар ман куллык юритиледи.
Дагестанда авылхозяйстволык ярмаркалар озгарылады, азык-туьлик кытлыгын болдырмас мыратта негизленген баалар бойынша уьзилгисиз продукция ман канагатлав уьшин АПК предприятиелери мен куллык юритуьв бардырылады. Дагестанда бааларга тергев салув эм олардынъ негизленмеген оьсуьвин болдырмас уьшин шаралар коьруьв бойынша УФАС пан биргелес куллык юритуьв орын табады. Язлык эгин куллыкларды озгарувга айырым тергев салынган. Энъ пайдалы яклав шараларды биргелес белгилев бойынша предпринимательство ман куллык юритиледи. Кайбир налогларды кемитуьв бойынша законопроект – макулласув болжалында, киши эм орта предпринимательстволык субъектлерине оькиметлик имуществосы уьшин арендалык тоьлев акында документ – токтастырув уьстинде. 500 миллион маьнеттен артык акша яшавшылардынъ ис пен каьрлев дережесин саклавга каратылган.
Белгилеп озайым: экономика берклигин канагатлав бойынша коьрилетаган шаралар заманында эм комплексли аьлде яшавга шыгарылмага керек. Туьзилген аьл баьри дережели власть органларыннан кескинли эм толы консолидация аьлинде куллык этуьвди талаплайды, – деп билдириледи телеграм-каналында.