Уллы Аталык согысынынъ топларынынъ атувлары токтаганлы эндиги 80 йылга ювык заман оьтип барса да, бизим элимиз сонынъ акында мутпайды. Мутпайды, неге десе дав – ол халкымыздынъ тарихининъ салдарлы уьйкен кесеги, бизим оьмирлик ян дертимиз, юрек сызлавымыз эм данъклы оьктемлигимиз.
Экинши дуныя согысынынъ катнасувшысы Аджигеткен Шабагатов Караногай районынынъ Куьнбатар авылында 1914-нши йылда тувган деп белгили. Авылда давга дейим эм оннан сонъ да оны коьплер таныганлар эм сыйлаганлар. Дурысында, Аджигеткен оьз заманынынъ билимли аьдемлерининъ бириси болган. Согыска дейим 1935-37-нши йылларда ол ерли колхозлардынъ бирисининъ председатели болып куллык эткен.
Уллы Аталык согысы басланувы ман бирге Кизляр округ военкоматынынъ шакырувы ман 1941-нши йылдынъ сентябриннен 1942-нши йылдынъ март айына дейим Аджигеткен Шабагатов 885-нши стрелковый полкынынъ сырасында немец-фашист аьскерлерине карсы каты согысларда ортакшылык эткен. Бу полк 290-ншы Кызыл байраклы Могилевши стрелковый дивизиядынъ санында болып, Уллы Аталык согысында 1941-нши йылдынъ 4-нши августыннан 1945-нши йылдынъ 9-ншы майына дейим катнаскан. Айтпага, 1941-нши йылда дивизия аьскершилери Брянск, Тула туьбинде авыр коршаланув согыслар юриткен. Солардынъ бирисинде снаряд кесеги совет аьскершисининъ аягын авыр яралайды эм Аджигеткен 1942-нши йылдынъ март айыннан 1943-нши йылдынъ январь айына дейим 1034-нши номерли эвакогоспитальде эмленеди. Сол йыл оны савлыгы яктан медкомиссия карары ман уьйине кайтарганлар.
Аджигеткен Шабагатов оьзи болса «Германияды енъуьв уьшин», «1941-1945-нши йылларда Уллы Аталык согысында кайратлы иси уьшин», «Уллы Аталык согысында Енъуьвге 20 йыл» медальлери мен савгаланган.
Давдан келген сонъ йигерли аьскерши Куьнбатар авыл Советининъ председатели, 1953-58-нши йылларда колхоздынъ бас зоотехниги болып ислеген. Яшавынынъ ызгы йылларында совхоздынъ почта боьлигин етекшилеген. Согыстан сонъгы кайратлы куллыгына Совет оькимети сый этип, ога 1970-нши йылда В.И.Ленин тувганлы 100 йыллыгы ман байланыста «Данъклы иси уьшин» медали тапшырылган.
1950-нши йылларда Аджигеткен Шабагатов бир неше кере Куьнбатар авыл Советине депутат болып сайланган.
Йыл сайын Енъуьв куьни алдында биз давда болганлардынъ аьр бирисин оьз авылларымызда, уьйлеримизде атлы-аты ман атаймыз. Аьлиги заманда районымызда олардынъ биреви де тири калмаганына да карамастан. Ол бизим энъ оьрметли аьдетимиз эм элимиз турган шаклы соьнмес оьмирлик эстелигимиз.
М.Юнусов.
Суьвретте: согыс катнасувшысы А.Шабагатов.
