Республикамыздынъ бас каласы Махачкалада полиция куллыкшысы, Россия Баьтири Магомед Нурбагандовка шатлыклы аьлде эстелик ашылды. Муннан тувра 7 йыл артта, 10-ншы июльде, полиция лейтенанты Магомед Нурбагандов боевиклер мен аявсыз оьлтирилген. Оьлеектен алдын ол, «Исленъиз, аданаслар!» деп, ис йолдасларына оьзининъ ызгы соьзлерин караткан.
Монумент Махачкаладынъ Абакаров орамында Азиз Алиев атындагы скверде ерлестирилген.
Соны ман байланыста оьткен шатлыклы шарада ДР Аькимбасы Сергей Меликов шыгып соьйлеген.
– Магомед Нурбагандовтынъ девизи мен коьп миллетли элимиздинъ баьри халклар ваькиллери, буьгуьнлерде согыс урыслар ерининъ алды сыраларында экстремистлерди каты согып, Тувган ерин, оьз элин, тынышлы халкты явдан коршалайдылар, – деди ол.
Полиция лейтенанты Магомед Нурбагандовтынъ «Исленъиз, аданаслар!» деген сонъгы соьзлери иш ислер органларынынъ баьри куллыкшыларынынъ – девизи, а оьткен йылда Украина еринде согыс спецоперациядынъ лозунгы болды.
2016-ншы йылдынъ 9-ншы июлинде полицейский оьз ювыклары ман Дагестанда Сергокала авылыннан узак болмаган ерде тыншайып турган. Эртенъликте онынъ палаткасына савыт-садаклы эрлер куьби янасады. Онынъ полицияда куллык этетаганын билип, бандитлер оны куьштен машинадынъ артына тиеп, урып оьлтируьвге аькеткенлер.
2016-ншы йылдынъ сентябрь айында РФ Президентининъ Указы ман полиция лейтенанты Магомед Нурбагандов оьлгеннен сонъ Россия Баьтири деген данъклы атка тийисли этилген.