Россия Федерациясынынъ Уголовлык кодексининъ 76.2 статьясына коьре, аьдем биринши кере, айлак авыр болмаган кыянатлык эткен болса, оны аьллерге коьре, уголовлык яваплылыктан босатып, тек штраф салып коймага да болады. Сол штраф заманы ман тоьленмесе, кыянатлык эткен аьдем, Уголовлык кодексининъ статьясына коьре, каты яваплылыкка тартылады. Уголовлык ис эм судлы штраф кебинде уголовлык-правовой касиетли шаралар токтатылганы акында материаллар суд пан следственный органга яде прокурорга йибериледи.

Белгилеп озбага тийисли, уголовлык-процессуальли законга коьре, штраф тоьлев болжалы йок. Соны салынганлай ок, тоьлеп тайдырмага керек. Эгер штраф салынган куьннен, календарь бойынша, он куьн кеткенше, суд приставынынъ колында штраф тоьленгени акында кагыт болмаса, ол салынган дембиди тайдырув эм уголовлык яваплылыкка тартув акында судка аьризе язады.
Сондай ис уьстиндеги суд заседаниеси токтастырувшы-приставтынъ соьзиннен басланады. Оннан сонъ йыйылган материалларды карайдылар, шайытлардынъ, куьналенетаган аьдемнинъ, адвокаттынъ, прокурордынъ ойлары тынъланылганнан сонъ, суд оьз токтасын шыгарады.
Россия Федерациясынынъ Оьр судынынъ Пленумынынъ позициясына коьре, айлак авыр болмаган кыянатлыкты аьдем биринши кере эткеннен сонъ салынган штраф, мысалга, ол куьшли авырып, больницага туьскен болса яде ис орынын йойып, бир ерден де материаллык келими йок болса, тоьлемей турмага болады. Салынган штраф тоьленмевдинъ бас себеплери Пленум кабыл этип алган токтастынъ 19-ншы пунктында белгиленген.