Янъыларда А-Х.Джанибеков атындагы мектебининъ актовый залында «Дени сав яслар – Россиядынъ келеектегиси» деп, форум озгарылды.
Форум «Ногайский район» МР администрациясындагы «Яслык» яслар орталыгы, 2020-ншы йылдынъ кырк кийик айында Ямагат палатасынынъ етекшиси Эльмурза Саитов, Дагестан Республикасынынъ миллет политикасы эм дин ислери бойынша министерствосы ман муниципаллык туьзилислериндеги ямагат палаталарын колтыклап, терроризм идеологиясына карсы турув социаллык маьнели проектлерди яшавга шыгарув уьшин уйгынланган шарасында енъгени уьшин, берилген 90 мынъ маьнет акшага уйгынланды.
Бу куьнги форумда ДР Аькимбасынынъ коьмекшиси К.Бадрутдинов, ДР дин ислери бойынша министерствосынынъ сырт зона бойынша етекшиси В.Зеленский, ДР яслар министерствосынынъ наркоманияга карсы турув боьлигининъ специалисти Абдулмажид Рамазанов, сол ок министерстводынъ профилактикалык программаларды эм граждан-патриотлык тербиялав управление боьлигининъ специалисти Шевкет Крумов, «Ногайский район» МР администрациясынынъ аькимбасы Мухтарбий Аджеков, онынъ орынбасары Баймагомед Ярлыкапов, Ногай район имамлар советининъ председатели Алимбек Арсланов, «Ногайский район» МР администрациясындагы Ямагат палатасынынъ председатели Эльмурза Саитов, Ногай район прокурорынынъ исин юритуьвши Аскербий Дильманбетов ортакшылык эттилер.
«Дени сав яслар – Россиядынъ келеектегиси» форумды Юлдуз Байгараева ашты эм юритти. Биринши хош келди соьзин Ногай район етекшиси Мухтарбий Аджеков айтты. Форумда ортакшылык эткен конаклардынъ аьр бирисине де соьз берилди. Олардынъ соьйлегениннен бир ортак ой шыгармага болады – терроризм маьселеси тек регион, район кезегинде шешилип калмага керек тувыл, бу маьселе федераллык кезегинде шешилмеге керек болады.
Йыйылган яслар алдында «ДР Яслар министерствосынынъ наркотиклерге карсы аьрекети, маьселелери эм соларды шешуьв йоллары» деген тема бойынша А.Рамазанов, «Ислам дининде аьлиги яшавдынъ етиспевликлери» деген тема бойынша А.Арсланов, «Интернет тармакларында балаларды коршалав» деген тема бойынша Ш.Крумов шыгып соьйледилер. Сонынъ барысында сорав – явап та болды.
Яслар форумы айлак кызыклы оьтти. Форумнынъ тамамын «Ногайский район» МР администрациясынынъ аькимбасынынъ орынбасары Баймагомед Ярлыкапов келтирди. Ызгы соьзди «Яслык» яслар орталыгынынъ етекшиси Абибулла Шамбилов: «Кайсы маьселеди де биргелесип шешпеге болады», – деген шакырувы ман тамамлады.
Келген конакларга, йыйылган яслар ваькиллерине аьзирленген кишкей концерт программасы коьрсетилди.
Г.Сагиндикова,
РФ Журналистлер союзынынъ агзасы.
Суьвретте: Ш.Крумов.
