Соьйтип аталган яслар форумы Терекли-Мектебтинъ Абдул-Хамид Джанибеков атындагы орта мектебининъ негизинде болып оьтти. Бу яслар форумынынъ озгарылувы ийги аьдетлердинъ бириси болады. Аьр йыл сайын кыс шагында яде куьздинъ сонъгы куьнлеринде бу шара савлай Ногай район мектеблериннен ийги окувшылар катнасып, озгарылады.
Форумды «Ногайский район «МР администрациясынынъ антитеррористлик комиссиясы ман «Яслык» яслар орталыгынынъ куллыкшылары уйгынлап озгарадылар.
Шарадынъ озувынынъ бас мырады: Яслар арасында патриотизм сезимлерин кенъ яйылдырув, ызгы заманлардынъ баьлелери –экстремизм, терроризм эм наркоманияга карсы турув.
Биз бу куьнлерде дени сав, акыллары толы ясларды тербияласак, келеектегимиз акында – ол яркын болаяк, деп айтпага боламыз.
Бу йыл озгарылган яслар форумында Ногай район мектеблерининъ окувшыларында лекторлар: Ногай район имамлар советининъ председатели Мухаммад Атангуловты, политика илмилер кандидаты, РФ Президентиндеги РАНГХиС-тынъ Астрахань каласындагы филиалынынъ илми-билимлендируьв орталыгынынъ директоры Эльдар Идрисовты (суьвретте), ДР Миллет политикасы бойынша министерствосынынъ шет эллердинъ гражданлары ман куллык этуьв боьлигининъ етекшиси Хасайбат Валиевады, ДР муфтиятынынъ ярыкландырув боьлигининъ куллыкшысы Алимбек Арслановты эм ДР билимлендируьв министерствосынынъ ваькили, теолог Газимагомед Мухумагазиевти тынъламага мырсат болды.
Олардынъ аьр бириси эртеректен белгили болган темалар бойынша окувшылар алдында соьйледилер, оьзлери соьйлеп калмай, окувшыларды да кызыксындырып, соравларына явап бердилер. Энъ де коьп эм ийги явап берген окувшылар китаплер мен савгаландылар.
А-Х.Джанибеков атындагы мектебинде озган «Дени сав яслар – Россиядынъ келеектегиси» деп аталган форум сонынъ озувында катнаскан ясларга коьп пайдалы билдируьвлер берди.
Форумнынъ тамамын «Ногайский район» МР аькимбасынынъ орынбасары Баймагомед Ярлыкапов келтирди.
Сондай шаралардынъ озгарылувы,оьзек те, ясларга пайдалы, ама соларга аьзирлик бир неше ай алдын коьрилсе, сапат яктан да уьйкен белги бермеге болаяк.
Г.Сагиндикова,
РФ Журналистлер союзынынъ агзасы.
