Диана Сариева: «Тек аьдемлердинъ вакцинацияды коьлем болып оьтуьви ямагатты аьдеттеги яшавга аькелмеге болаяк».

«Шоьл тавысы» газетасынынъ хабаршылары Ногай районынынъ яшавшыларыннан: «Яйылув маразыннан вакцинация эттиргенсиз бе?», – деген соравына яваплар алып келедилер. Сондай соравды биз Ногай патшалык фольклор-этнографиялык ансамблининъ солисти Диана Сариевага да бердик. Ол бизге булай явап берди:
– Ногай районынынъ сыйлы яшавшылары!
Буьгуьнлерде яйылув маразыннан тура аьл бек оьткир туратаганы аьр кайсымызга да белгили. Куьн сайын янъы авырыганлардынъ саны аянланып оьсип келеди. Аьр кайсымыз да уьйкен коркыныш тувдырган кавыфлы душпан пан куьрес бардырылатаганын коьремиз.
Маразды юктырган аьр бир аьдем оьз тарихи мен баскаланады. Олай деген, бирев байрам яде дувас шараларында болувы ман, баска сол авырувга ынанмай, сонъында авырувды юктырады. Боьтен де юкпалы маразы кайдай да бир авырувлары болган ясуьйкен аьдемлер уьшин бек кавыфлы. Сонынъ уьшин аьдем денинде авырувга иммунитет беркитуьв уьшин, кешиктирмей барып прививка эттирмеге тийисли. Тек коьлем вакцинация савлай ямагатты аьдеттеги яшавга аькелмеге болаяк. Сонынъ уьшин вакцинация ол мараздан куткарылув амалы болады.
Савлай элимизде, сонынъ ишинде республикамызда да, Ковид-19 маразына карсы тегин вакцинация юритиледи.
Сыйлы ердеслеримиз! Биз савлайымыз да алдынгы яшавга кайтпага суьемиз. Бизге сол йол ман барувда тек вакцинация ярдамласаяк.
Сыйлы ердеслерим, сизди коронавирус маразыннан вакцинацияга кол силтеп коймай, тоьгеректегилеринъиздинъ акында ойланып, эттирмеге шакыраман. Маданият та ден савлыгы болган миллет пен оьрленип барады. Оьзимиздинъ эм кардаш-тувганларымыздынъ ден савлыгын саклап билейик, – дейди Диана Сариева.