Медицина куллыкшысынынъ куьни элимизде йыл сайын июнь айынынъ 3-нши каты куьнинде байрамшыланады. Бу куьн энъ де сыйлы эм маьнели исин бардыратаган – медицина куллыкшыларынынъ ийги иси белгиленеди, оларга савгалар эм баргылар тапшырылады.

Индира Нажмудиновна Мамутова Ногай орталык больницасында 2014-нши йылдан алып аьрекетлейди. Ол Астрахань каласындагы медицина академиясын уьстинликли тамамлап, сол каладагы С.Киров атындагы клиникалык больницасында терапия бойынша ординатурада билим алды. Сонъ Махачкалада Дагестан патшалык медицина университетинде кардиология бойынша курслар оьткен. «Юрек авырув тек кенъ эм танъ юрек пен эмленеди», – деп эситкенмен. Ногай ЦРБ-нынъ врач-кардиологы Индира Мамутовадынъ акында да танъ юрекли деп айтканлар бар. Бу куьнлерде, ол ислеп баслаган биринши куьнлерде оны йылы соьзи эм маслагаты ман коьтергишлеген Фаризат Межитовады, Мадина Арслановады, Куьмисхан Сабутовады, Асирет Абдурахмановады, Зульфия Шугаиповады, Динара Аккишиевады белгилейди. «Меним ясуьйкен ис йолдасларым, дайым да заман тавып, берген соравыма явап эм маслагатлар беретаган эдилер», – дейди Индира Мамутова. Ол аьли Ногай орталык больницасында эм поликлиникада ислейди. Яс врач йылдан-йылга оьз сулыбын оьстирип барады. Биз оны кеспи байрамы ман кутлап, исинде уьстинликлер йораймыз.
Н.Кожаева.
Суьвретте: И.Мамутова.