Мага ис аьрекетиме коьре коьп аьдемлер мен аьллеспеге туьседи. Булай да ата-бабаларымыздан несилден-несилге коьширилип сакланатаган аьдетлеримизге коьре коьлем аьдемлер катнасувы ман оьтетаган туьрли кайгылы( яназы, дуваслар…) эм куванышлы ( тойлар, мерекели яхшылыклар…) оьзгерислерде боламыз. Эм пандемия ман байланыста туьзилген авыр эпидемиялык аьлде аьр аьдем оьзининъ бас байлыгы – ден савлыгын сакламага керек экенин аян анълайсынъ.

Авырувдан сакланув уьшин вакцинация эттирмеге керек деп ойладым. Эм мине сол кавыфлы мараздынъ сырагысында кайбир аьеллерге кайгы ман распага туьскенин коьргенде, вакцинация процедурасын оьтпеге токтастым. Сондай абыт этуьвге кызым да себеплик этти. Сырт бетте яшайтаган кызым бизге конакка келгенде, эш бир ойланмай оьтти вакцинацияды бизим эмлев учреждениеде.
Вакцинадынъ зарарлыгы акында туьрли соьзлер юритилсе де, мен медицина тармагынынъ аналитиклерининъ эм экспертлерининъ ойларына негизленемен. Меним ойыма коьре, вакцинацияды оьткенге, бу кавыфлы маразды мен юктырмадым. Вакцинация – оьзинънинъ эм касындагыларынынъ ден савлыкларын аман саклавдынъ бас амалы.
Куьндаруьв Курманова, Терекли-Мектеб авыл яшавшысы.