Ногай район халк яратувшылык уьйининъ методисти, Дагестан Республикасынынъ ат казанган маданият куллыкшысы Нина Халиловадынъ баславы ман Терекли-Мектеб авылынынъ «Лира» кафесинде районнынъ маданият ветеранларынынъ йолыгысы болып оьткен.
Узак йыллар бир тармакта куллык этип, аьлиги заманда тийисли тыншаювында болган эсли аьдемлердинъ юреклерине етисуьв уьшин коьп зат керекпейди: арада бир тек оларды эске алып, эс берилсе болады. Айхай да, бу хатерсиз дуныядынъ аьр куьнлик ювырысында биз аьдем янына керекли, ювык болган сезимлеримизди коьрсетпеге мутамыз. Яшав болса бир еринде турмайды, бир заман бурылып оьзинъе карасанъ, оьзинънинъ де эсли болганынъды анъсыздан эслейсинъ…
– Аьли мен бу ерде сизинъ баьринъизди де коьрип, тоьбем коькке етип суьйиндим, коьнъилим коьтерилди. Мен, ушынын айтсам, ызгы заманларда совет йылларында маданият куллыкшысы болып ислегенимди муткан эдим, оьзимди тек дин аьрекетшиси деп санап келгенмен. Мундай шара, мен билип, бизим районда биринши кере болып туры, савболсын Нина Темирбековна, ол бизди соьйтип бу авыр заманларда колтыкламага суьеди. Оьзек те, аьли бек кыйын маданият куллыкшысы болып ислемеге. Коьп авыл клублары ябык. Мине бизим бир заманларда Хасавюртты, Бабаюртты, Махачкалады коьплеген каравларда, конкурсларда уьйкен тамашага калдырган авылымыз. Сонынъ эндигиси маданият уьйи бузылып ятыр. Сол затка меним ишим янады. Ногай маданиятына коьмек эткен авылымыз эндиги сондай аьлге еткен. Аьли бизде совхоз йок, авыл администрациясы бир ерден акша алып болмайды, – деди Эдиге авыл яшавшысы, маданият ветераны Курман Болатов.
Ол оьзининъ соьзинде, биз коьп кере айтувлы суьвретши Сраждин Батыровтынъ аьзирлеген кийимлерин мактаймыз, ама соларды аьли той эткенде бирев сама киеме деген эм баска аьдет пен байланыслы соравларды коьтерди, йыйылган баьри де район маданият ветеранларына яхшылык йорады.
Муннан сонъ, Калинин авылдынъ китапханасынынъ эсли етекшиси, маданият ветераны Авасхан Кульниязова Нина Халилова ман мектебте бирге окыганы, неге Нина маданият куллыкшысы кеспиди сайлаганы акында кызыклы этип хабарлады.
– Биз Нина Темирбековна ман яртыншы класстан алып бирге окыганмыз. Онынъ канында сол заманнан алып маданиятка суьйимлиги бар эди. Ога бир кере атасы каладан кобыз аькелген. Нина сонда ойнап уьйренди. Ол бизге тагы да скрипка, баска анъ алатлары акында хабарлаган. Биз скрипка дегенди кайдан коьргенмиз? Орысша бир соьз билмегенмиз. Соны ман Нина яшавында оьз мырадына етисти. Маданият яшавы, йырлар, биювлер коьнъилди коьтереди, соны ман не зат тенълеспеге болады? Аьли клубларымызда муьлк те, акша да йок, тек шаркымызда савлык, аьдемшилик бар. Сол затлардынъ болганы уьйкен наьсип деп санайман. Баьри де ветеранларга тек ден савлыкты йорайман, а коьнъилди олар коьтерип боладылар, – деди Авасхан Кульниязова.
Элли йылдан артык заман куллык эткен районнынъ маданият тармагында Танъсылув Аджибаева. Элбетте, йолыгыска шакырылганлардынъ арасында ол энъ де сыйлы ветеранлардынъ бириси эди.
– Мен 1962-нши йылдан алып клубта ислеп баслаганман. Ога дейим 6 ай авыл балалар бавында тербиялавшы болып куллык эттим. Клубта ислеп турганда, ол замандагы район маданият боьлигининъ етекшиси Мархаба Саллыбаева бизди Дербентке аькетти. Сонда мен китапхана боьлигине окувга заочно туьстим. Он сегиз ясымнан алып етпис ясыма дейим район китапханасында иследим, – деп эскерди ис йыллары акында Танъсылув Аджибаева. Ол йыйылганларга ийги йоравларын айтты.
Шарада катнаскан Ленин авылынынъ маданият уьйининъ алдынгы директоры Абидат Искакова район маданиятынынъ ийги йылларын эскерди. Йолыгыста оьз эскеруьвлери, йылы йоравлары ман маданият ветеранлары, Бораншы авылдан Сабират Елакаева, Батыр-Мурзадан Еллетхан Теркеева, Червленные Буруныдан Фатима Кульчикова, Кара-Сувдан Кайтарбий Бальгишиев, Карагастан Алимет Аблезова, Зульфия Аджигеримова, Нариманнан Аминат Кудайбердиева, Уьй-Салганнан Насипхан Салакаева эм баскалар боьлистилер.
Шарада аьр бир авыл маданият уьйи оьз авыл тарихи эм маданият ветеранлары акында хабарлайтаган суьвретли альбомлар выставкасын коьрсетти. Соларда айтылган район маданият ветеранлары, Кумлыдан – Юнус Кожаевтинъ, Нарбике Муталлаповадынъ, Умар Ваисовтынъ, Червленные Буруныдан – Залимхан Зинеевтинъ, Нариманнан – Яхья Кудайбердиевтинъ, Эдигеден – Курман Болатовтынъ, Батыр-Мурзадан – Еллетхан Теркеевадынъ, Терекли-Мектебтен – Тавжан Алиевадынъ эм коьп баска белгили аьдемлердинъ суьвретлери эм олар акында хабарлар язылып ерлестирилген.
Йолыгысты йыр эм анъ яктан Бегали Куруптурсунов, Зульфия Аджигеримова, Алимет Аблезова ыспайладылар. Шарада Нина Халилова туьрли кызыклы конкурслар да озгарды.
М.Ханов.
Суьвретте: район маданият ветеранларынынъ куьби.
