Оьткен юма, 14-нши июльде, «Ногайский район» МР Депутатлар йыйынынынъ кезексиз 51-нши сессиясы болып озды. Сонынъ сырагысында район депутатлары Ногай район аькимбасы ис орынына кезекли 5 йыл болжалына Джамалутдин Эсиргеповты сайладылар.
Ога дейим район администрация залында муниципаллык районынынъ аькимбасынынъ ис орынына сайлавга кандидатларды айырув бойынша конкурс комиссиясынынъ йыйыны болып оьтти. Сонынъ сырагылары келтирилген сонъ комиссия председатели, ДР иш политикасы эм ерли самоуправлениеси бойынша управление етекшисининъ орынбасары Али Ибрагимов район депутатларын солар ман таныстырды. Онынъ айтувы ман, быйыл Ногай муниципаллык районынынъ аькимбасынынъ ис орынына 5 аьдемнинъ кандидатуралары коьрсетилген эди. Бу йолгы конкурс комиссиясы тамамында сайлавга деп 3 кандидатлар: Мурат Мамаевти, Махмуд Караевти эм район Депутатлар йыйынынынъ председатели Джамалутдин Эсиргеповты айырды. «Баьри 3 кандидатлар да буьгуьн билимлерининъ йогары оьлшемин коьрсеттилер. Олардынъ кайсысы да район етекшиси ис борышларын юритип болаяк. Эндиги сиз сайлав этинъиз, депутатлар», – деди Али Ибрагимов.
Сессияды баслай берип, Депутатлар йыйынынынъ председатели Джамалутдин Эсиргепов залда 16 район депутатлары барлыгын, болса да район прокуратурасынынъ карары ман Терекли-Мектеб авыл Депутатлар йыйыныннан район йыйынына йиберилген 4 депутатлардынъ тавыслары кесек заманга токтатылганы акында билдирди. Сонынъ уьшин, деди ол, буьгуьнги сессияда тавысламага ыхтыяры болган 12 депутатлар келгенлер, сол шаклы депутатлар саны карарлар алувга тийисли кворумга етиседи.
Муннан сонъ Д.Эсир- гепов ол бу сессиядынъ куьн йосыгына шыгарылган район аькимбасын сайлавларда кандидат болувы ман байланыста сессиядынъ куллыгын онынъ орынбасары Рашид Шангереев юритеегин билдирди.
Рашид Шангереев сессиядынъ куьн йосыгынынъ биринши соравы район етекшисин сайлав экенин айтып эситтирди. Сол ерде район депутаты Омаргаджи Шахбанов тавыславды ашык кепте оьткермеге кенъес этти. Депутатлар кенъести макул коьрдилер эм баьриси бир тавыстан Ногай район аькимбасы ис орынына Джамалутдин Эсиргеповты сайладылар.
Омаргаджи Шахбанов район депутатлары атыннан янъы сайланган район аькимбасын кутлады эм район Депутатлар йыйынынынъ председатели этип сонынъ дайымлык депутаты Рустам Байманбетовты сайламага маслагат этти. Район парламентарийлери бу маслагатты да хош коьрдилер эм Ногай район Депутатлар йыйынынынъ председатели этип бир ниеттен Рустам Байманбетовты сайладылар.
Оьз кезуьви мен районнынъ янъы сайланган аькимбасы Джамалутдин Эсиргепов эм парламентининъ етекшиси Рустам Байманбетов олардынъ кандидатураларын хош коьргени уьшин депутатларга разылыгын билдирдилер эм савлайы район Депутатлар йыйынын тувган муниципалитет уьшин бир ниетте куллык этпеге шакырдылар.
Сессиядынъ куллыгында Ногай район аькимбасынынъ куллыгын юритуьвши Хамидулла Саитов, район прокурорынынъ коьмекшиси Сталинбек Абдуллаев, Терекли-Мектеб, Эдиге, «сельсовет Коктюбинский» СП МО аькимбаслары Зейдулла Аджибайрамов, Расул Елгишиев, Замир Суюндиков эм баскалар катнастылар.
