Кезекли аппарат йыйынын «Ногайский район» МР администрациясынынъ аькимбасынынъ орынбасары Баймагомед Ярлыкапов юритти.
Ол йыйыннынъ «Организациялар архивлерин паспортизациялав сырагылары акында» деген биринши соравы бойынша соьзди «Ногайский райархив» МКУ директоры Надия Башантавовага тапшырды.
Н.Башантавовадынъ айтувы ман, РФ Архив фондынынъ документлерин патшалык эсаплав регламенти мен келисли аьлде 3 йылда бир кере район архиви савлай элимиздегиндей болып, муниципаллык архивин туьзуьвши организация-булаклар ведомстволык архивлерин паспортизациялав исин оьткереди.
2018-нши йылдынъ 1-нши карагыс айына район архивин туьзуьвши булаклар эсабында 33 организациялар барлыгы эсапка алынган. Солардынъ 29-ы паспортизацияга кирген.
Район архив етекшиси документлерди тек дурыс толтырув тувыл, ама соларды закон бойынша токтастырылган заман ишинде саклав маьнели экенин белгиледи.
«Документлерди саклав уьшин тийисли аьллер тек 4 организацияларда: ЦРБ, УСЗН, мировой суд эм «сельсовет Коктюбинский» СП МО администрациясында туьзилген. Соларда документлер айырым кабинетлерде, «сельсовет Карагасский» СП МО администрациясында янмайтаган шкаф ишинде сакланадылар. Калган баьри де организацияларда дайымлык эм кесек заман сакланатаган ислер шкафларда эм специалистлер кабинетлериндеги ис столларында сакланадылар. Ол зат документлерди тийисли кепте сакламага амал бермейди», – деди Н.Башантавова.
Ол солай ок ойласылатаган сорав бойынша тагы да бир неше аян мысаллар келтирди.
Йыйыннынъ «Нариман, Червленные Буруны, Куьнбатар эм Карагас авылларында парк зоналарын коьрклендируьв бойынша курылыс-монтаж ислерининъ юриси акында» деген экинши соравы бойынша «Ногайский район» МР администрациясынынъ ОКС МКУ директоры Рашид Аджиков шыгып соьйледи.
Онынъ билдируьви мен, «Комфортная городская среда» деген Федераллык программасы бойынша Ногай районы ериндеги Нариман, Карагас, Куьнбатар эм Червленные Буруны авыл паркларын 8044407 маьнет акша оьлшеминде коьрклендируьв куллыклары этилинмеге каралган. Буьгуьнлерге Нариман авыл паркында 690 квадрат метр ерлерге тротуар плиткалары тоьселген, 750 м.п. узынлыгы болган борт таслары салынган. Мунда аьли де паркты ярыкландырув, электротеллер тартув, темир туяклы олтыргышлар салув эм баска ислер этилинмеге тийисли. Р.Аджиковтынъ соьзине коьре, Куьнбатар, Карагас эм Червленные Буруны авыл паркларын коьрклендируьв уьшин материаллар аькелинип туры. «Подрядчиклердинъ айтувы ман баьри куллыклар да белгиленген заман болжалыннан эрте кутылаяк», – деп белгиледи ол.
М.Юнусов.
