Бу юмадынъ саьли куьнинде савлай Россия эли Аталыктынъ тысында россиянлылар оьзлерининъ аьскерлик борышын толтырувдынъ эстелик куьнин белгиледи. Соны ман байланыслы болып, Сергей Меликов, Дагестан Республикасынынъ Аькимбасы, оьзининъ соьзин айтты:

«Буьгуьн биз Россия Федерациясынынъ тысында 30 «кызувлы ерлерде» оьзлерининъ янларын аямай, аьскерлик урыслардынъ катнасувшыларына сый эм оьрмет этемиз.
1989-ншы йылдынъ увыт айынынъ 15-нши куьни – бизим халкка, Афган еринде болган урыслардынъ катнасувшыларына мутылмастай белги.
Бу куьн 33 йыл артта энъ сонъгы совет аьскершиси Афган ериннен шыкты, коьп йыллык Афган согысы кутылган. Коьплеген яс аьдемлердинъ яшавлары кыскардылар, сол аьскершилер санында бизим ердеслеримиз де бар эди. Афган еринде аьскер борышын толтырган баьри ердеслеримиз де сав-эсен уьйлерине келген деп айтып болмаймыз.
Буьгуьн де биз уьйкен сый-оьрмет этемиз эм эсимизде саклаймыз Россия Федерациясынынъ 30-дан артык «кайнавлы точкалар» ерлеринде болган кавгалар катнасувшыларына. Оьз Эли уьшин тынышлык заманында согыста болув – ол айырым йигитлик. Авыр аьллерде тувган ериннен узакта аьскершилер эм гражданлык специалистлер, оькимет кызыксынувларын яклап, оьз борышын йигитлик пен толтырганлар. Бизим яслардынъ, оьз янларын аямай, савытлы-садаклы кавгаласувларды токтатувда катнасканлары олар Уллы Аталык согысы йылларында фашизмди енъген аталарынынъ эм ата-бабаларынынъ йигитлигине тийисли экенликти шайытлайды. «Меним увылым уьйкен атасына, Тувган Элин енъуьви мен данъклатып, Эдил йылгасы туьбинде согысканга усамайма?» – деп язган Аталыгымыздынъ язувшылары арасыннан бириншилер сырасында болып, сол вакытта Афганистан элине барган Дагестаннынъ халк шаири Фазу Алиева.
Эм буьгуьнде ветеранлар маьнели ислерден шет турмайдылар, ямагат яшавында белсенлик пен катнасадылар, афган еринде беркиген аьскерлик аданаслыкка алаллыгын саклайдылар, сакатларга эм ян берген йигитлер аьеллерине ярдамласадылар, ясларды патриотлык яктан тербиялавга айырым эс каратадылар. Сонынъ уьшин уьйкен разылык оларга!