Оьткен дуьйсемби куьн, 2-нши кырк кийик айында, Ногай районында ис йорыгы ман Дагестан Республикасынынъ Оькиметининъ Председателининъ орынбасары Екатерина Толстикова конакта болган.
Ол «Ногайский район» МР администрациясынынъ аькимбасы Мухтарбий Аджеков пан эм район билимлендируьв боьлигининъ етекшисининъ куллыгын юритуьвши Алтын Агаспарова ман бирге А-Х.Джанибеков атындагы Терекли-Мектеб авыл орта мектебиндеги янъы окув йылынынъ басланувына багысланган шатлыклы линейкада ортакшылык эткен.
Окувшыларга каратылган соьзинде регион Оькиметининъ Председателининъ орынбасары бу мектебтинъ окувшысы, Калининградта оьткерилген адабиат бо- йынша Савлайроссиялык конкурсынынъ енъуьвшиси Замир Мурзаевтинъ уьстинлиги баьрисин де оьз билимлерин оьстирмеге эм йогары олимпиадаларда оьнерлерин коьрсетпеге канатландырмага керегин белгилеген.
Мектеб директоры Курасхан Ярикбаева конакларды «Точка роста» деген билимлендируьв орталыгы уьшин аьзирленген кабинетлерге киргистти.
Е.Толстикова кабинетлерге этилинген ыспайы ярастырув куллыкларын яратты, билимлендируьв орталыктынъ ийги дизайнын, айырым логотипин белгиледи, директорга мектебтинъ калган кесегин де (мысалы уьшин саьнедеги панель туьслерин) ийгилендирмеге болаягын айтты.
Муннан сонъ делегация «150 мектеб» деген республикалык проектинде катнаскан Кара-Сув эм Калинин орта мектеблеринде де конакта болдылар.
Бу авыл мектеблерининъ коллективлери конакларды бек йылы йолыктылар, оьзлерининъ янъыртылган мектеблерин коьнъилленип коьрсеттилер. Баьри ярас-тырув ислери де – мектеблердинъ азбарларын, полларды, терезелерди, капыларды, йылытув радиаторларын авыстырувлар заманы ман кутылганлар. Йылы аьжетханалар да курылганлар.
Окытувшылар эм ата-аналар бу мектеблерде этилинген сапатлы ярастырув ислери уьшин разылыкларын билдиргенлер.
Екатерина Толстикова оьткерилген куллыклардынъ сырагылары ман макул экенин билдирген. Соны ман бирге ол мектеблер коллективлерине армаган да сондай етимисли аьлде ислемеге, айтпага, косымша билимлендируьв куллыгын (ТОКС, уьлке танув эм с.б.) да юритуьвди ойламага кенъес эткен.
