Роспотребнадзордынъ токтасына коьре, ислейтаган гражданлар, эгер оларда медициналык карсылыклар йок болса, коронавируслы инфекциядан вакцинация оьтпеге керек. Республикадынъ ис коллективлери, сонынъ ишинде бизим Ногай район да бар, буьгуьнлерде вакцинация кампаниясында белсен катнасадылар.

Дагестан региональли «Россельхозбанк» АО филиалынынъ Терекли-Мектебтеги косымша офисининъ уьйкен тувыл (7 аьдем) коллективи куьн сайын районымыздынъ онлаган яшавшыларын аьжетсизлейди. Буьгуьнлерде офистинъ етекшиси Абдурахман Ильяс увылы Койлубаев эм уьш куллыкшысы коронавирустан вакцинациясынынъ биринши кезегин оьттилер.
– Бу йылдынъ басында мен эм эки куллыкшы коронавирус пан авырдык, сога коьре мараздынъ кайдай авыр экенин билемиз. Биз аьдемлер мен ислеймиз, районда аьлиги осал аьллерди эсапка алып, бир ойга келдик: вакцинацияды коллектив пен оьтпеге. Коронавирустан вакцинациядынъ акында яман хабарлар шыгаратаганларга, прививкадан коркатаганларга маслагат бермеге суьемен – бираз йигерли болынъыз эм оьзинъиз, кардаш-тувганларынъыз акында ойланъыз. Мен сизге артынъызга каранъыз деп айтаман, бизим элимизде вакцинация оьрленуьвининъ тарихине маьне беринъиз. Бир неше йыллардынъ артында грипптан да вакцинация шыгарганлар, бирев де коркпаган ша сол заман. Аьдемлер барып, вакцинация оьткенлер. Эм маразды енъгенлер. Аьлиги заманда да солай болар эди, эгер биз дурыс сайлав этип, вакцинацияды баьримиз де оьтсек, – деп айтты Абдурахман Койлубаев «Шоьл тавысы» республикалык газетасынынъ хабаршысына.