Элимиздинъ куьнбатар япсарлары бурыннан бери заман-заманы ман бизге шет эллердинъ аьскерлери шапкынлык этетаган ерлер деп белгили. Айтпага, XIII оьмирде сондай явлардынъ бириси деп немец рыцарьлери, XVII оьмирде – поляк интервентлери, XIX оьмирде – Наполеоннынъ етекшилиги мен французлар, XX оьмирде – 1-нши эм 2-нши Дуныя согыслары аьсеринде немец аьскерлери саналганлар. Болса да, аьр заман да душпанлар тийисли каты явап алган сонъ, кери кувылганлар. Бизим XXI оьмиримизде де явлар сондай ниетиннен тайыспадылар. 2014-нши йылда Украинадагы басын коьтерген янъы, нацистлер США ман Куьнбатар эллерининъ колтыклавына таянып, патшалык авдарылысын эттилер. Муннан сонъ олар оьзлерининъ намарт идеологиясын эм йорыкларын бу патшалыктынъ Донецк, Луганск эм кубыла-куьнтуварындагы баска областьлерде тынышына туратаган орыс яшавшыларына карсы киргистип басладылар.
Россия оьз гражданларын кавыфлыкта калдырмады. Буьгуьнлерде Украинада, дурысында, бизим янъы россия регионлары: ДНР, ЛНР, Запорожье эм Херсон областьлеринде болып турган ислер акында баьриси де биледилер. Буьгуьнлерде юзлеген мынъ яс кеделер, оьз элининъ эркинлигин эм бойсынмаслыгын коршалап, янъы нацистлерге карсы согыс операциясынынъ алды сырасында турадылар. Олардынъ юреклери бизим исимиз онъ, душпан бузгышланаяк эм енъуьв бизики болаяк деген асыл ниетке эм сенимге толы. Бу соьзлер 1941-нши йылдынъ авыр навасыз шилле айынынъ 3-нши куьнинде радиодан элимиздинъ ол замандагы етекшиси Иосиф Сталиннинъ совет халкына эткен шакырувы аьсеринде айтылган, эм буьгуьнлерде бизим патшалыгымыздынъ эм армиядынъ аьлиги етекшилерининъ авызларында да айтылып турады.
Былтыр кырк кийик айында Тувган Элдинъ буйырыгы ман мобилизацияга кеткен биринши яслардынъ, аьлиги заманда СВО катнасувшыларынынъ сырасында Дагестандагы Ногай районынынъ Терекли-Мектеб авыл яшавшысы Руслан Кельдимуратов та бар эди. Сога дейим, ол 2010-2011-нши йылларда элимиздинъ ракеталы аьскерлеринде оьзининъ эр борышын намыслы кепте толтырган.
Былтыр куьзде Владикавказ каласындагы аьскер боьлигинде бир юма турган сонъ, Русланды эм онынъ йолдасларын Крымдагы Джанкой каласына, соннан согыстынъ алды сызыгы оьтетаган Запорожье областине йибергенлер. Буьгуьнлерде ол элимиздинъ мотострелковый аьскерлерининъ сырасында СВО-да катнасады. Басында оларга коьп затларга коьнмеге, уьйренмеге керек болды, ама кесек заманнан мунда да яшав оьз йорыгына туьсти. Аьскершилер окоплар, ерказбалар каздылар, танкларды, пушкаларды явга коьринместей этип ясырдылар, коршаланув объектлерин курдылар. Аьлиги заманда Руслан оьз йолдаслары ман бирге Запорожье атомлы электростанциясын эм сондагы яшавшыларды украин нацистлериннен коршалайдылар. Душпаннынъ дронларын урып уьйренди эм оьзининъ согыс савытын аьруьв кулланып биледи. Оныси ман бирге согыс дежурствосын онынъ ердеслери: агалы-инили Абдулбариевлер, Рамберди Оразниязов, Осман Аджигайтканов та сак эм йигитлерше юритедилер. Касиетине коьре коьп соьзсиз авыр туратаган Руслан эндигиси олардынъ боьлигининъ командири, киши сержант деген кезекли аьскер дережесин 23-нши увыт айында, Аталыкты саклавшылар куьнинде алган. Савытлы куьшлер сырасында намыслы эм алал кепте куллык этуьви уьшин медаль мен, аьскер командованиеатыннан Сый грамотасы ман савгаланган.
Быйыл язлыкта, коькек айында, отпускка, тувган уьйине, ата-анасын коьрмеге деп келип кеткен. Курал айында тагы да СВО юритилип турган ерине кайткан эм аьли сонда оьзининъ эр йигит йолдаслары ман бирге согыс спецоперациясынынъ борышларын толтырады.
– Дурыс, уьйде бизим тувган ювык аьдемлеримиз, куллыкларымыз эм тынышлы ислеримиз калганлар, – дейди Руслан. – Тек болса да мунда, согыстынъ алды еринде, душпан элимиздинъ ишине кирмесин деп биревлер турмага керек боладылар. Сонынъ уьшин де буьгуьн биз баьримиз де мундамыз.
М.Юнусов.
Суьвретте: Руслан Кельдимуратов.
