30-ншы куралда, элимизде, республикамызда эм сонынъ санында Ногай районымызда куьнибурын «Единая Россия» Савлайроссиялык политикалык партиясынынъ кандидатлары арасыннан быйыл кырк кийик айында болып оьтеек сайлавларга тийислилерин айырув ниет пен тавыслав озды. Бу шарады партия «Единая Россия» сырасыннан кандидатларды аьдемлер оьзлери айырсын деген ниет пен уйгынлап оьткерди.

Тавыслав бюллетеньлер таслав эм электронлы кебинде юритилди эм сол ок куьн тувра 20 саьатте тамамланды. Сол куьн 18:00 саьатте республика бойынша 305 мынъга ювык дагестанлылар яде сайлавшылардынъ ортак санынынъ 18 проценти тавыслаганы белгили болган. Олай дегени, 233 мынъ дагестанлылар тавыслав пунктларына келип, 72 мынъ сайлавшылар болса онлайн йорыгы ман тавысларын бергенлер.
– «Куьнибурын юритилген тавыслав сабыр эм тийисли йорыгы ман оьткерилди. Бу маьнели политикалык оьзгеристе катнаскан эм гражданлык белсенлигин коьрсеткен аьр кимге разылыгымызды билдиремиз», – деген «Единая Россия» партиясынынъ Дагестан регионаллык боьлигининъ секретари Хизри Шихсаидов.
Элимиз бойынша тавыславдынъ сырагылары тезден белгили болаяк.