Элимизге кыйынлык келгенде, онынъ эркли увыллары Тувган ерин коршалавга турдылар. Йигитлер элининъ суверенитетин эм сыйын коршалав, солай ок тынышлы яшавшылардынъ рахатлы яшавы уьшин оьзлерининъ уьйлерин таслап, СВО озып турган ерге йолланганлар. Заман сизди сайлаган. Соьйтип ол Уллы Аталык согысы йылларында куба чумадан дуныяды эм оьз элин коршалав уьшин бизим атайларымызды эм уьйкен атайларымызды сайлаган. Сиз, согыс спецоперациясынынъ катнасувшылары, олардынъ исин бардырасыз. РФ Президенти Владимир Владимирович Путин айтканлай, сизинъ аьр биринъиз баьтир. Сиз- аьскершилер, коршалавшылар! Сизде маьнели мырат! Соны ман оьктемсинъиз эм баьтир атынъызды басынъызды коьтерип юритинъиз.
СВО барысында командованиединъ борышларын аьскер йолдаслары ман бирге бизим ердесимиз Арсен Мурат увылы Аджибаев те толтырады. Терекли-Мектеб авылында тувып-оьскен йигит согыс спецоперация оьтип турган ерге озган йылдынъ кырк кийик айынынъ 28-нши куьнинде йолланган. Аьскер боьликлерининъ бирисинде толы болмаган мобилизация бойынша шакыртылганларды аьскер исине бир неше куьнлер узагына уьйреткенлер. Мунда эр кисилер, олар уьшин керек болса яшавын эм савлыгын аямаяк, алал йолдаслар тапканлар. Мине эндиги олар урыслар болып турган ерде. Биринши айлар Арсен Аджибаев алдышылыкта болган, оьз яшавын сынавга салып, явды соккан. Сондай яшавынъ кавыфлыкта болган куьнлерде, аьдем оьзининъ кардаш-тувганларын, тувган авылын, озган куьнлерин эсине алады.
Алдышылыкта бизим ердесимиз де оьзининъ яшавын эсине алатаган болгандыр: А.Джанибеков атындагы мектебте окыган йылларын, окытувшыларын, бирге окыган тенълерин. Бир неше кере биринши занъ байрамы, аьскерге оны йолга салган ювыклары, Хабаровск каласында аьскер сыраларында куллык эткен куьнлери онынъ коьзлерининъ алдына келген болар. Аьскер сырасыннан кайтып, ол аьел курганын, кайтип аьели акында каьр шеккенин де йылувлык пан эскергендир. Сонъ Сургут каласында Сургутнефтегазда коьлик айдавшы болып ислеген куьнлери… Етекшилев ягыннан яваплылы иси уьшин разылык соьзлери.. Тагы да коьзлерининъ алдына толы болмаган мобилизация бойынша повесткады алып, бир кишкей де ойланмай, Донбасста яшаган халкты коршалавга кеткени де келген болар. Солай ок анасынынъ кайгыга толган коьзлери, сондай, спецоперация болып турган ерге эри кетееги мен байланыслы хабарды эситип, ойга коьмилген хатыны Элина да онынъ юрегине авыр болып тийген болар.
Аьли Арсен Мурат увылы самоходно-артиллерия батареясынынъ канагатлав взводынынъ боьлигининъ коьлик айдавшысы болып ислейди. Ызгы заманда ол бизим аьскершилерге согыс спецоперациясы болып турган ерге азыклар еткереди, ондагы техникады бензин, солярка ман толтырады. Арсен Аджибаевке етекшилевдинъ борышларын СВО озып турган ерде заманы ман толтырганы эм аьскер аьзирликти дайым саклап турганы уьшин Сый грамотасы тапшырылган. Коьрсеткен эрклиги уьшин де 2-нши дережели «За воинскую доблесть» медали мен савгаланган.
Янъыларда бизим ердесимиз оьзининъ тувган авылына кыска болжаллы тыншаювга келип кеткен. Ол ата-анасынынъ уьйинде эки юма узагында турган. Анасы Абидатка увылын тагы да СВО озып турган ерге йибермеге бек авыр болган. Кыскаяклы увылы олардынъ янында аьли де бираз турганын суьйген. «Меним согыс йолдасларымды да, сен мени куьткенлей, аналары карайдылар. Ол хатынлар да увылларын сагынганлар. Мен согыс спецоперация озып турган ерге тез арада кайтпага тийислимен, йолдасларым оьз аналары ман йолыгысар уьшин», – деген явап береди Арсен оьз анасына.
– Мен оьзек те, баьри затты да анълайман. Бизим увылларымыз – Аталыгынынъ коршалавшылары, Эли шакырув эткенде, оны коршалавга турмага борышлылар. Тек мага увылымды тагы да эм тагы да спецоперация болып турган ерге йолга салмага, онынъ кийимлерин сонда кетпеге аьзирлемеге тыныш тувыл. Боьтен де мага авыр болады, уныкларым атасын кушаклап, узак заман оны йибермей турганда. Уныгым Арсеннен сорайды: «Атам, мен мектебке окымага барганда, сен янымда болаяксынъ ша, сен сол куьн кайтаяксынъ ша да?» Арсен болса ога не деп явап береегин билмей, кушагына кысып, уьндемей, увылынынъ басын сыйпайды.
Бизим аьвлетлеримиз тек аналарынынъ тувыл, Россиядынъ да увыллары боладылар эм олар Элининъ явларын каты сокпага тийислилер. Олар Куьнбатар эллерининъ биргелесине Россия энъ де куьшли держава экенин, онда эркинли оьктемли гражданлар яшайтаганын коьрсетпеге кереклер! Бу куьнлерде болаяткан оьзгерислер–олар тынышлык уьшин, бизим аьеллер, бизим келеектеги несиллердинъ рахатлыгы уьшин куьрес. Оьзек те, мага увылымнынъ яшавы эм ден савлыгы куьн сайын сынавда болатаганын анълав бек авыр болады. Ама баьтирлердинъ аналары оьзлерининъ увылларын тийисли болмага кереклер. Бу кыскаяклыларга куьшли эм сабыр болув бек маьнели. Олар увылларына яв ман куьреспеге куьш бермеге кереклер. Йылы соьзи мен, маслагаты ман, йогары коьнъили мен Енъуьв бизики болаягына сенимин коьрсетпеге тийислилер. Мен сенемен увылларымыз тезден Енъуьв мен уьйге кайтаякларына», – дейди Абидат Аджибаева.
Биз Арсеннинъ ата-анасы Мурат эм Абидат Аджибаевлерге шынты Эл коршалавшысын тербиялаганлары уьшин разылыгымызды билдиремиз. Эл патриотлары болып тувмайдылар, оларды ата-анасы тербиялайдылар. Увылы согыс спецоперациясында катнасатаган аьр бир ердесимизге савбол айтамыз. Баьри Согыс спецоперациясынынъ катнасувшыларына – Элине алаллыгы эм суьйими уьшин. Кудай сизинъ йолынъызды ярык этсин, уьйинъизде болса сизди ювыкларынъыз дайым йылы куьтсин. Коьптен бери биз куьтип турган Енъуьвге йолынъыз йойымсыз болсын. Тынышлы аспан астында оьз балаларынъызды биринши кере биринши класска элтенъиз, аьскер сыраларында куллык этпеге йолга салынъыз…Биз баьримиз де коьптен бери куьтетаган Енъуьв келсин.
Н.Кожаева.
Суьвретте:А.Аджибаев.