Уллы аты болган Россия, кайдай кыйын аьлде болса да, тизине бир де шоькпеген. Эр йигитлер, артларына бурылып та карамай, дайым элди коршалавга аьзир болганлар. Оьзимиз Уллы Аталык согысы юрген йылларды коьзимиз бен коьрмеген болсак та, коьплеген булаклардан окыганмыз эм ясуьйкенлеримиздинъ хабарларыннан да эситкенмиз, сол йылларда Уллы Енъуьвди ювыклатув уьшин кешеси-куьндизи мен яс та, карт та оьз уьлисин коскан. Не шаклы оьспир, яслары, он сегизге толмаган болса да, согыска кетпеге шалысатаган болган, кеткенлер де араларында аз болмаган. Биревлери ясларына яс костырганлар, баскалары, биревден де сорамай, оьзлери явга карсы шыкканлар. Оьзек те, сол заманларды аьлиги мен тенълестируьв кыйын. Коьп янъылыклар яшавга кирген, аьдемлердинъ касиетлери де коьпке туьрленген. Биревге де ясыртын тувыл, тербия яктан да коьп баскалыклар бар. Патриотизм деген анълам да куьшин йойгандай болып коьринеди. Патриот аьдем – кайсы ерде де оьзин, элин яклап болмага керек, явдынъ коьзине тувра карап болув да, сонынъ бир кеби болатагандыр.

Уллы Аталык согысында, Афган еринде, Шешен еринде болган урысларда болсын, бизим аьскершилер тек йигерликти, йигитликти коьрсетип келгенлер, элдинъ келеектегисин ойлап, оьз яшавларын курманлыкка салганлар.
Аьли де элимизге кыйын заманлар келип турганда, оьз эрки мен элди коршалавга шыкканлар да бар, олардынъ атларын биз оьктемлик пен атаймыз эм элге тынышлыкты, сол аьскершилерге ден савлыкты тилеймиз. Уьстимиздеги йылдынъ кырк кийик айынынъ 21-нши куьнинде Россия Федерациясынынъ Президенти Владимир Путин толы болмаган мобилизация басланувы акында билдирген. Сога коьре, элди коршалавга бармага керек эр йигитлердинъ сыралары да кепленген. Бизим ердеслеримиз де сол санда бар. Ерли аьскер комиссариат куллыкшылары ман берилген шакырувды бир соьзсиз алып, элди коршалавга шыккан йигитлеримиз бен оьктеммиз. Оькинишке, халк арасында шакырувды кабыл этпейтаганлардынъ атлары да аталадылар. Кайда бизим уллы ногай халкымыздынъ йигерлиги, ушкан окты токтаткан, шапкан атты тартып йыккан?!.
Оьзек те, тынышлыкта оьскен аьдемлерге, олар тербиялаган балаларга согыс дегенде катнасув тувыл экен, аты аталганын эситпеге бек кыйын. Аявлап оьстирген балаларды от кайнаган ерлерге йиберуьв тынышлардан тувыл. Бурын атайларымыздан калган соьзлеримиздинъ маьнесине карайык – Эр йигитлер – эли уьшин тувады. Сога коьре, элди эрлер коршаламаса, ким коршаламага керек?!.
Г.Сагиндикова,
РФ Журналистлер союзынынъ агзасы.